மக்கள் பிரச்சினைக்காக அரசியல் கட்சிகள் போராட்டம் நடத்தி ஆதரவு திரட்டுவது சகஜம் தான். ஆனால், விழுப்புரம் மாவட்ட அரசியல்வாதிகள் மழை வெள்ளத்தை வைத்தும் ‘தொலைநோக்கு’ சிந்தனையுடன் போராட்டம் நடத்தி இருப்பது இப்போது வெளிச்சத்துக்கு வந்திருக்கிறது.
நவம்பர் 30-ம் தேதி தொடங்கி டிசம்பர் 3-ம் தேதி வரை அடித்த பேய்மழைக்கு யாரும் எதிர்பாராத விதமாக இம்முறை விழுப்புரம் மாவட்டம் கடுமையாக பாதிக்கப்பட்டது. ஃபெஞ்சல் புயலின் போது மாவட்டம் முழுமைக்கும் சராசரியாக 55 சென்டிமீட்டர் மழை பெய்தது. விழுப்புரம் நகரில் மட்டுமே 63.5 சென்டிமீட்டர் அளவுக்கு மழை கொட்டியது. இதனால் பாதிப்பும் அதிகம் ஏற்பட்டது. இதையடுத்து வெள்ள நிவாரணம் கேட்டு ஆங்காங்கே போராட்டங்கள் வெடித்தன. அமைச்சர்கள் வந்து பார்க்கவில்லை என ஆதங்கப்பட்டனர் மக்கள். களக்கத்துக்குச் சென்ற அமைச்சர் பொன்முடி மீது சேற்றை வாரி இறைத்தும் சிலர் அரசியல் செய்தனர்.
