ஜெட்டா: இரண்டு நாள் பயணமாக சவுதி அரேபியா சென்ற பிரதமர் மோடிக்கு ஜெட்டாவில் 21 குண்டுகள் முழங்க உற்சாக வரவேற்பு அளிக்கப்பட்டது. சவுதி வான் பரப்பில் பிரதமர் மோடியின் விமானத்தை சவுதி விமானப்படை விமானங்கள் பாதுகாப்பாக அழைத்துச் சென்றன. சவுதி பட்டத்து இளவரசர் முகமது பின் சல்மான் அழைப்பை ஏற்று, பிரதமர் மோடி 2 நாள் பயணமாக சவுதி அரேபியாவுக்கு நேற்று புறப்பட்டுச் சென்றார். பிரதமர் மோடியின் 3வது சவுதி பயணம் இது. மேலும், வரலாற்று சிறப்புமிக்க ஜெட்டா நகருக்கு அவர் முதல் முறையாக சென்றுள்ளார். பிரதமர் மோடியின் விமானம் சவுதி வான் எல்லைக்குள் நுழைந்ததுமே, சவுதி விமானப்படையின் எப்-15 விமானங்கள் பாதுகாப்பாக அழைத்துச் சென்றன. இது இரு நாடுகளுக்கு இடையேயான பாதுகாப்பு ஒத்துழைப்பை பிரதிபலிக்கும் வகையில் அமைந்தது.
அதைத் தொடர்ந்து ஜெட்டா சர்வதேச விமான நிலையத்தில் வந்திறங்கிய பிரதமர் மோடியை மெக்கா பிராந்திய துணை ஆளுநரான இளவரசர் சவுத் பின் மிஷால் பின் அப்துல் அஜிஸ் மற்றும் வர்த்தக அமைச்சர் மஜித் அல்காசபி ஆகியோர் வரவேற்றனர். 21 துப்பாக்கி குண்டுகள் முழங்க மோடிக்கு உற்சாக வரவேற்பு அளிக்கப்பட்டது. ஜெட்டா சென்றடைந்ததும், தனது இந்த பயணம் இந்தியா, சவுதி இடையேயான நட்பை வலுப்படுத்தும் என மோடி தனது எக்ஸ் தளத்தில் குறிப்பிட்டார். மேலும் சவுதி பட்டத்து இளவரசரை தனது சகோதரர் என வர்ணித்தார்.
விமான நிலையத்தில் இருந்து ஓட்டலுக்கு வந்த மோடிக்கு இந்திய வம்சாவளியினர் மோடி, மோடி என முழக்கமிட்டு சிறப்பான வரவேற்பு அளித்தனர். சவுதி பாடகர் ஹாஷிம் அப்பாஸ் பிரபல இந்தி திரைப்பட பாடலை பாடி வரவேற்றார். அங்கு இந்திய வம்சாவளியினர்களுடன் மோடி கலந்துரையாடினார். இந்த பயணத்தில் சவுதி பட்டத்து இளவரசர் முகமது உடனான சந்திப்பில் ஹஜ் புனித பயணத்தில் இந்தியர்களுக்கான ஒதுக்கீடு குறைக்கப்பட்டது தொடர்பாக பிரதமர் மோடி பேசுவார் என எதிர்பார்க்கப்படுகிறது.
மேலும், விண்வெளி, எரிசக்தி, சுகாதாரம், அறிவியல் மற்றும் ஆராய்ச்சி, கலாச்சாரம் மற்றும் மேம்பட்ட தொழில்நுட்பம் ஆகிய துறைகளில் 6 ஒப்பந்தங்கள் கையெழுத்தாக உள்ளன. இப்பயணத்திற்கு முன்பாக அரபு செய்தியாளர்ளுக்கு பிரதமர் மோடி அளித்த பேட்டியில், ‘‘சவுதி அரேபியா இந்தியாவின் மிகவும் மதிப்புமிக்க நம்பகமான நட்பு நாடு. கடல்சார் அண்டை நாடுகளான இந்தியாவும் சவுதி அரேபியாவும் பிராந்தியத்தில் அமைதி மற்றும் ஸ்திரத்தன்மையைப் பாதுகாப்பதில் ஆர்வத்தைப் பகிர்ந்து கொள்கின்றன’’ என்றார்.
The post இரண்டு நாள் பயணமாக சவுதி சென்றார் பிரதமர் மோடி: 21 குண்டுகள் முழங்க உற்சாக வரவேற்பு appeared first on Dinakaran.
