ஆட்சியில் பங்கு வேண்டும் என தமிழக காங்கிரஸ் தலைவர்கள் கேட்டுக் கொண்டிருக்கும் நிலையில், அதைச் சாதித்துக் கொள்வதற்காக காங்கிரஸ் கட்சி தவெக-வுடன் கூட்டணி சேருமா என்ற எதிர்பார்ப்பும் நிலவி வருகிறது. இருப்பினும் பிஹார் தேர்தல் முடிவுகளை ஒட்டியே தமிழகத்தில் கட்சிகளின் கணக்குகள் மாறும் என அரசியல் பார்வையாளர்கள் தெரிவிக்கிறார்கள்.
கட்சி தொடங்கி இன்னும் ஒரு தேர்தலை கூட சந்திக்காத தவெக-வுடன் கூட்டணி வைக்க, முக்கிய கட்சிகள் பலவும் முண்டியடிக்கும் நிலையில், அக்கட்சி, தனது தலைமையில் கூட்டணிக்கு சம்மதிப்பவர்கள் தாராளமாக வரலாம் என நிபந்தனை வைத்துக் காத்திருக்கிறது. தவெக-வின் தலைமையில் ஒரு புதிய கூட்டணி அமைந்தால், அந்த அணிக்கும் திமுக-வுக்கும் இடையே தான் போட்டி என்று விஜய்யைப் போலவே டிடிவி.தினகரன் சொன்னாலும், அவருக்கு தவெக-வின் கதவுகள் இன்னமும் திறந்தபாடில்லை.
