மதுரை: திருப்பரங்குன்றம் மலை தர்காவில் தொழுகை நடத்த தடையை மீறி செல்ல முயன்றதாக பாஜக சிறுபான்மை பிரிவு தேசிய செயலாளர் வேலூர் இப்ராஹிம் கைது செய்யப்பட்டார். அவரது மனைவியும் கைது செய்யப்பட்டார்.
பாஜக சிறுபான்மை பிரிவு தேசிய செயலாளராக இருப்பவர் வேலூர் இப்ராஹிம். இவரது பிறந்தநாளை யொட்டி மதுரை திருப்பரங்குன்றம் முருகன் கோயிலில் தரிசனம் மற்றும் மலைமேலுள்ள சிக்கந்தர் தர்கா பள்ளிவாசலில் சிறப்பு தொழுகை மேற்கொள்ள திட்டமிட்டார். இதற்காக தனது மனைவியுடன் மதுரை வந்த அவர், திருப்பரங்குன்றம் தனக்கன்குளம் பகுதியில் லாட்ஜில் தங்கி இருந்தார். அங்கே கேக் வெட்டி, பிறந்தநாளை கொண்டாடினர். மதியத்துக்கு மேல் மனைவியுடன் காரில் புறப்பட்டு திருப்பரங்குன்றம் நோக்கிச் சென்றார்.
