செங்கல்பட்டு மாவட்டம் மாமல்லபுரத்தில் பல்லவ மன்னர்களின் சிற்பக்கலையை பறைசாற்றும் வகையில் அர்ஜூனன் தபசு, ஐந்துரதம், கடற்கரை கோயில், கிருஷ்ண மண்டபம் மற்றும் பஞ்ச பாண்டவர்கள் மண்டபம் எனப்படும் முழுமை பெறாத வடக்கு கிருஷ்ண மண்டபம் உட்பட பல்வேறு சிற்பங்கள் அமைந்துள்ளன. பாரம்பரியமான இச்சிற்பங்களை யுனெஸ்கோ அங்கீகரித்துள்ளது. இவற்றை இந்திய தொல்லியல்துறையினர் பாதுகாத்து பராமரித்து வருகின்றனர்.
இவற்றில், கடற்கரை பகுதியில் உள்ள குடவரை கோயில், ஐந்துரதம் சிற்பங்கள் ஆகியவை, உப்பு காற்றில் சேதமடையாமல் இருக்க, அவ்வப்போது ரசாயன பூச்சுகள் பூசப்பட்டு பாதுகாக்கப்பட்டு வருகிறது. ஒரே பாறையில் வடிவமைக்கப்பட்ட பாண்டவர் மண்டபத்தில் உள்ள குடவரை சிற்பங்கள் சுற்றுலாப் பயணிகளை வெகுவாக கவரக் கூடியவை. அச்சிற்பம் வடிவமைக்கப்பட்டுள்ள விதம் மற்றும் சிற்பத்தின் நுட்பமான வேலைப்பாடுகள், காண்போரை வியக்கவைக்க கூடியவை.
