சென்னை: அண்ணா பல்கலைக்கழக வளாகத்தில் பாதுகாப்பை அதிகரிக்க எடுக்க வேண்டிய நடவடிக்கைகள் குறித்து ஆளுநருக்கு ஆசிரியர்கள் சங்கம் கடிதம் எழுதியுள்ளது. துணைவேந்தர் நியமிக்கப்படாததால் அன்றாட செயல்பாடுகள் பாதிக்கப்பட்டுள்ளன என்றும் தெரிவித்துள்ளது.
இதுதொடர்பாக தமிழக ஆளுநரும், பல்கலைக்கழக வேந்தருமான ஆர்.என்.ரவிக்கு அண்ணா பல்கலைக்கழக ஆசிரியர்கள் சங்க தலைவர் ஐ.அருள் அறம் அனுப்பியுள்ள மனுவில் கூறியிருப்பதாவது: அண்ணா பல்கலைக்கழக வளாகத்தில் கடந்த 23ம் தேதி ஒரு மாணவிக்கு நேர்ந்த பாலியல் வன்கொடுமை சம்பவத்துக்கு எங்கள் சங்கம் சார்பில் கடும் கண்டனம் தெரிவித்துக் கொள்கிறோம். இச்சம்பவத்தால் பல்கலைக் கழகத்தின் புகழ், பெருமை பெரிதும் பாதிக்கப்பட்டுள்ளது. காவல் துறையில் புகார் கொடுத்த மாணவியின் தைரியத்தை பாராட்டுகிறோம்.
