சென்னை: டாஸ்மாக் நிறுவனத்தில் நள்ளிரவில் சோதனை நடத்தி பெண் அதிகாரிகளை அடைத்து வைத்தது மனித உரிமை மீறல் என்று தமிழக அரசு தரப்பில் உயர் நீதிமன்றத்தில் வாதிடப்பட்டது. டாஸ்மாக் தலைமை அலுவலகத்தில் கடந்த மாதம் 6ம் தேதி முதல் 8ம் தேதி வரை சோதனை நடத்திய அமலாக்கத் துறை, டாஸ்மாக் நிறுவனத்துக்கு மதுபானங்கள் கொள்முதல் செய்தது, பார் உரிமம் வழங்கியது, மதுபானங்களை மதுபான கடைகளுக்கு கொண்டு செல்வதற்கான போக்குவரத்துக்கு டெண்டர் வழங்கியது உள்ளிட்டவற்றில் 1000 கோடி ரூபாய் முறைகேடு நடந்துள்ளதாக அறிக்கை வெளியிட்டது. அமலாக்கத் துறையின் இந்த சோதனையை அரசியலமைப்பு சட்டத்தின் கூட்டாட்சி கட்டமைப்புக்கு விரோதமானது என அறிவிக்கக் கோரியும், அரசு அனுமதியின்றி நடத்தப்பட்ட சோதனையை சட்டவிரோதமானது என அறிவிக்க கோரியும், விசாரணை என்ற பெயரில் டாஸ்மாக் அதிகாரிகளை துன்புறுத்த கூடாது என அமலாக்கத் துறைக்கு உத்தரவிடக் கோரி தமிழக உள்துறை செயலாளரும், டாஸ்மாக் நிர்வாக இயக்குனரும் சென்னை உயர் நீதிமன்றத்தில் வழக்கு தாக்கல் செய்திருந்தனர்.
இந்த வழக்கை விசாரித்த, நீதிபதிகள் எம்.எஸ்.ரமேஷ் மற்றும் என்.செந்தில் குமார் அமர்வு, அமலாக்க துறை பதிலளிக்க உத்தரவிட்டு, விசாரணையை தள்ளிவைத்தனர். அதுவரை எந்த நடவடிக்கையும் எடுக்க கூடாது என உத்தரவிட்ட நீதிபதிகள், எந்த வழக்குகளின் அடிப்படையில் அமலாக்க துறை சோதனை நடத்தியது என்பது குறித்த விவரங்களையும் பதில்மனுவில் தெரிவிக்க வேண்டும் எனவும் உத்தரவிட்டிருந்தனர். இந்நிலையில் இந்த வழக்கு மீண்டும் விசாரணைக்கு வந்த போது, இந்த வழக்கின் விசாரணையில் இருந்து விலகுவதாக நீதிபதிகள் அறிவித்தனர். இதையடுத்து, இந்த வழக்கு நீதிபதிகள் எஸ்.எம்.சுப்பிரமணியம், ராஜசேகர் ஆகியோர் அடங்கிய அமர்வில் விசாரணைக்கு வந்தது. அப்போது இந்த வழக்கில் அமலாக்கத்துறை பதில் மனு தாக்கல் செய்தது. அதில், இந்த வழக்கு விசாரணைக்கு உகந்ததல்ல. அதிகாரிகளை துன்புறுத்தவில்லை.
சோதனையின்போது உரிய நடைமுறைகள் கடைபிடிக்கப்பட்டது. அனைத்து பெண் அதிகாரிகள், ஊழியர்களை இரவுக்கு முன்பே அனுப்பிவிட்டோம். உரிய தகவலின் அடிப்படையிலேயே சோதனை நடத்தப்பட்டது என்று கூறப்பட்டுள்ளது. அப்போது அட்வகேட் ஜெனரல் பி.எஸ்.ராமன் ஆஜராகி, பெண் ஊழியர்களை இரவு முழுவதும் அடைத்து வைத்துள்ளனர். இது அப்பட்டமான மனித உரிமை மீறல். முன் வழக்கு எதுவும் இல்லாமல் டாஸ்மாக் நிறுவனத்தில் சோதனை நடத்தப்பட்டுள்ளது சட்ட விரோத பண பரிமாற்ற சட்ட பிரிவுகளுக்கு முரணானது என்று வாதிட்டார். மேலும், அமலாக்கத்துறையின்பதில் மனுவுக்கு அரசு தரப்பில் பதில்மனு தாக்கல் செய்யவுள்ளோம் என்றார். இதையடுத்து, வழக்கு விசாரணையை வரும் 8ம் தேதிக்கு நீதிபதிகள் தள்ளிவைத்தனர்.
The post அமலாக்கத்துறை மனித உரிமை மீறலில் ஈடுபட்டுள்ளது: டாஸ்மாக் நிறுவன சோதனையை எதிர்த்த வழக்கில் தமிழக அரசு வாதம் appeared first on Dinakaran.
