அம்பேத்கர் குறித்து மாநிலங்களவையில் மத்திய உள்துறை அமைச்சர் அமித் ஷா பேசியது நாடு தழுவிய அரசியல் சர்ச்சையாகி உள்ளது. அமித் ஷாவை ராஜினாமா செய்யச்சொல்லி எதிர்க்கட்சிகள் கோதாவில் குதிக்க, “நான் அம்பேத்கர் பற்றி பேசியதை காங்கிரஸ் திரித்து விட்டது” என்று சொல்லி இருக்கிறார் அமித் ஷா. அம்பேத்கர் கருத்து இத்தனை அமளிதுமளிகளை ஏற்படுத்துவது ஏன்?
டிசம்பர் 17-ம் தேதி மாநிலங்களவையில் உரையாற்றிய அமித் ஷா, ” அம்பேத்கர்… அம்பேத்கர் என முழக்கமிடுவது இப்போது ஒரு ஃபேஷன் ஆகிவிட்டது. இதற்குப் பதிலாக கடவுளின் பெயரை இத்தனை முறை உச்சரித்திருந்தால் அவர்களுக்கு சொர்க்கத்தில் இடம் கிடைத்திருக்கும்” என்று சொன்னது சர்ச்சையாக வெடித்தது.
