சென்னை: அமைச்சர் செந்தில் பாலாஜிக்கு எதிரான வழக்கில் தடய அறவியல் துறை உதவி இயக்குநர் தவிர்த்து மற்றவர்களிடம் விசாரணை நடத்த அமலாக்கத் துறைக்கு அனுமதியளித்து சென்னை முதன்மை அமர்வு நீதிமன்றம் உத்தரவிட்டுள்ளது.
கடந்த 2011-15 -ம் ஆண்டுகளில் அதிமுக ஆட்சி காலத்தில் போக்குவரத்துத் துறை அமைச்சராக பதவி வகித்த தற்போதைய அமைச்சர் செந்தில் பாலாஜி, அரசு போக்குவரத்துக் கழகத்தில் வேலை வாங்கித் தருவதாகக்கூறி பணமோசடியில் ஈடுபட்டதாக சென்னை மத்திய குற்றப்பிரிவு போலீஸார் 3 வழக்குகளைப் பதிவு செய்திருந்தனர். இந்த வழக்குகளின் அடிப்படையில் சட்டவிரோதப் பணப்பரிமாற்றத்தில் ஈடுபட்டதாக அமைச்சர் செந்தில் பாலாஜிக்கு எதிராக அமலாக்கத் துறையும் வழக்குப்பதிவு செய்து அவரை கைது செய்தது. இந்த வழக்கில் நீண்ட இடைவெளிக்குப்பிறகு செந்தில் பாலாஜி்க்கு உச்ச நீதிமன்றம் ஜாமீன் வழங்கியது.
