அம்பேத்கரை அவமானப்படுத்திய அமித்ஷா வலிக்காமல் வலியுறுத்த கூட மனமில்லாமல் ஆழ்ந்த உறக்கத்தில் எடப்பாடி பழனிசாமி: அமைச்சர் ரகுபதி டிவிட்

சென்னை: அம்பேத்கரை அவமானப்படுத்திய அமித்ஷாவை, வலிக்காமல் வலியுறுத்த கூட மனமில்லாமல் ஆழ்ந்த உறக்கத்தில் எடப்பாடி பழனிசாமி இருக்கிறார் என்று அமைச்சர் ரகுபதி விமர்சித்துள்ளார். அமைச்சர் ரகுபதி நேற்று தனது டிவிட்டர் பதிவில் கூறியிருப்பதாவது:
அம்பேத்கரை அவமரியாதை செய்த அமித்ஷாவை கண்டித்து நாடே கொந்தளித்துக் கிடக்கிறது. முதல்வர் கடும் கண்டனத்தைப் பதிவு செய்ததோடு, இன்று நாடு தழுவிய போராட்டத்தில் திமுகவும் பங்கெடுக்க வேண்டும் என உத்தரவிட்டார்.

அதன்படி தமிழ்நாடு முழுக்க திமுக கண்டன ஆர்ப்பாட்டத்தை முன்னெடுத்து வருகிறது. நாடாளுமன்ற வளாகத்திலும் திமுக உள்ளிட்ட எதிர்க்கட்சிகள் மிகக் கடுமையாக எதிர்ப்பினை பதிவு செய்து வருகிறார்கள். அம்பேத்கருக்கு களங்கம் ஏற்படுத்த முயலும் சனாதன சக்திகளுக்கு துணைபோகும் விதமாக அதிமுக பொதுச்செயலாளர் எடப்பாடி பழனிசாமி வாய் மூடிக்கிடக்கிறார்.

ஒன்றிய பாஜ அரசு மக்களாட்சியை அழிக்க கொண்டுவரத் துடிக்கும் ‘ஒரே நாடு ஒரே தேர்தல்’ பற்றி எதுவும் கூறாமல் அமைதி, இஸ்லாமிய சமூக மக்களை இழிவாக பேசிய நீதிபதி விவகாரத்திலும் அமைதி, அம்பேத்கரை அவமானப்படுத்திய அமித்ஷாவைக் கண்டிக்க கூட வேண்டாம் “வலிக்காமல் வலியுறுத்த” கூட மனமில்லாமல் அமைதி…அமைதியோ அமைதி என ஆழ்ந்த உறக்கத்தில் இருக்கிறார் பழனிசாமி. யார் கண்ணில் படாமல் பதுங்கு குழியில் பதுங்கி கொண்டிருக்கும் பழனிசாமியைக் கண்டால் யாரேனும் கேட்டுச் சொல்லுங்கள். அம்பேத்கர் யார் என்றாவது அவருக்கு தெரியுமா என்று? இவ்வாறு அவர் கூறியுள்ளார்.

The post அம்பேத்கரை அவமானப்படுத்திய அமித்ஷா வலிக்காமல் வலியுறுத்த கூட மனமில்லாமல் ஆழ்ந்த உறக்கத்தில் எடப்பாடி பழனிசாமி: அமைச்சர் ரகுபதி டிவிட் appeared first on Dinakaran.