*கலெக்டர் பேச்சு
பொள்ளாச்சி : பொள்ளாச்சி வடக்கு ஒன்றியத்திற்குட்பட்ட ஒக்கிலிப்பாளையம் ஊராட்சியில் நேற்று, குடியரசு தினத்தை முன்னிட்டு கிராம சபை நடைபெற்றது. இந்த கூட்டத்தில் மாவட்ட கலெக்டர் கிராந்திக்குமார்பாடி சிறப்பு பார்வையாளராக கலந்து கொண்டார்.
மேலும், இந்த கிராம சபை கூட்டத்தில் பொள்ளாச்சி சப்-கலெக்டர் கேத்தரின் சரண்யா, மாவட்ட ஊரக வளர்ச்சி முகமையின் திட்ட இயக்குநர் மதுரா, உதவி இயக்குநர் கமலக்கண்ணன், திருமூர்த்தி நீர்த்தேக்க திட்ட கழு தலைவர் பரமசிவம், வடக்கு ஒன்றிய திமுக செயலாளர் மருதவேல் மற்றும் வட்டார வளர்ச்சி அலுவலர்கள் அரசு அலுவலர்கள் கலந்து கொண்டனர்.
இக்கூட்டத்தில் மாவட்ட கலெக்டர் கிராந்திக்குமார் பாடி கூறியதாவது: குடியரசு தினத்தை முன்னிட்டு கோயம்புத்தூர் மாவட்டத்தில் உள்ள அனைத்து ஊராட்சிகளிலும் கிராமசபை கூட்டம் நடைபெற்றது. சாலை அமைப்பு, வடிகால் பொதுகுடிநீர் குழாய் உள்ளிட்ட அடிப்படை வசதிகள் குறித்து பொது மக்கள் தங்கள் கோரிக்கையை தெரிவிக்கலாம். அரசின் திட்டங்கள் அனைத்து தரப்பு மக்களையும் சென்றடையும் வகையில் செயல்படுத்தப்படுகிறது.
கோயம்புத்தூர் மாவட்டம் வேளாண்மை, தொழில் ஆகிய துறைகளில் வளர்ச்சி நிறைந்த மாவட்டமாக திகழ்கின்றது. பெற்றோர்கள் அனைவரும் தங்கள் குழந்தைகள் முழுமையாக பள்ளிப்படிப்பை முடித்தபிறகு, உயர் கல்வி பயில்வதற்கு கட்டாயம் அனுப்ப வேண்டும். மற்ற மாவட்டங்களில் இளைஞர்கள் படித்த பிறகு வேலை தேடி பிற மாவட்டங்களுக்கு செல்ல வேண்டிய நிலை உள்ளது.
ஆனால், நம்முடைய மாவட்டத்தில் படித்த அனைத்து இளைஞர்களுக்கும் அவர்களின் திறமை, படிப்புக்கு ஏற்ற வேலைவாய்ப்புகள் கிடைக்கின்றன. இந்த வாய்ப்பினை அனைவரும் முழுமையாக பயன்படுத்திக் கொள்ள வேண்டும்.
அரசினர் தொழில் பயிற்சி நிலையங்களில் ஐடிஐ படிப்பவர்களுக்கு அதிகமான வேலைவாய்ப்புகளும், சுயதொழில் வாய்ப்புகளும் நிறைந்துள்ளன. தமிழ்நாட்டில் அதிக அளவிலான பெண்கள் வேலைக்கு செல்கின்றனர்.
மேலும், இனிவரும் காலங்களில் பெற்றோர்கள் தங்கள் பெண் குழந்தைகளின் படிப்பை பாதியில் நிறுத்தாமல் கட்டாயம் உயர்க்கல்வி வரை அவர்களை படிக்க வைக்கவேண்டும். அவர்களின் பொருளாதார முன்னேற்றத்திற்கும், தன்னம்பிக்கைக்கும் அவர்கள் வேலைக்கு செல்லவேண்டியது அவசியமாகிறது.அனைத்து மாணவ, மாணவிகளும் பள்ளி படிப்பை முடித்த பின் உயர் கல்வியினை பெறவேண்டும்.
அதில் குறிப்பாக பெண் பிள்ளைகளுக்கு படித்தவுடன் திருமணம் செய்து வைக்காமல் அவர்களை கட்டாயம் கல்லூரிக்கு அனுப்பி படிக்க வையுங்கள். அவர்கள் சுதந்திரமாகவும், அவர்களுடைய பொருளாதார தேவையினை அவர்களை பூர்த்தி செய்து கொள்ளும் வகையில், வேலைவாய்ப்பினை பெறுவதற்கு அவர்களுக்கு உயர்கல்வி அவசியமாகும்.
எனவே, பெற்றோர்கள் அனைவரும் தங்கள் பெண் பிள்ளைகளை கட்டாயம் படிக்க வைக்கவேண்டும். பெண்கள் அனைவரும் ஒன்றிணைந்து மகளிர் சுய உதவிக்குழுக்களில் சேரலாம். அதன் மூலம் வழங்கப்படும் கடனுதவிகளை பயன்படுத்திக்கொள்ளவேண்டும்.
நான் முதல்வன் திட்டத்தின் கீழ் பள்ளிப்படிப்பை முடித்த மாணவர்களுக்கு அடுத்த என்ன படிக்கலாம், எந்த பாடப்பிரிவு எடுத்து படித்தால் வாழ்வில் முன்னேற்றம் அடையலாம் என்பது குறித்து வழிகாட்டப்படுகிறது. மேலும், உயர்வுக்கு படி முகாம்களின் வாயிலாக 12ம் வகுப்பு தேர்ச்சி பெற்ற அல்லது தேர்ச்சி பெறாத மாணவர்களுக்கான உயர்கல்வி வழிகாட்டுதல் வழங்கப்படுகின்றது.
பொருளாதார வசதி இல்லாததால் ஒரு மாணவனால் படிக்கமுடியவில்லை என்ற நிலை இருக்கக்கூடாது என்பதற்காகதான் கோயம்புத்தூர் மாவட்டத்தில் பொருளாதாரத்தில் பின்தங்கிய மாணவ, மாணவிகள் உயர்கல்வி பயில்வதற்கு மாபெரும் கல்வி கடன் வழங்கும் முகாம்கள் நடத்தப்பட்டு வருகின்றன.
இன்றைய பள்ளி மாணவ, மாணவிகளால்தான் வருங்காலத்தில் இந்த பொருளாதார சாதனையை நாம் அடையமுடியும். அதற்கு மாணவ, மாணவிகளுக்கு சரியான வழிகாட்டுதலை நாம் வழங்கவேண்டும்.
பொள்ளாச்சி பகுதி விவசாயத்தில் சிறந்து விளங்குகிறது.
விவசாயம் முக்கியமான தொழில். நம்முடைய மாவட்டத்திலேயே தமிழ்நாடு வேளாண் பல்கலைக்கழகம் இருக்கின்றது. விவசாயம் செய்ய விரும்புவர்கள் வேளாண் கல்லூரியில் பயின்று பின்னர் விவசாயம் செய்வதால் புதுப்புது நவீன தொழில்நுட்பத்தை பயன்படுத்தி அதிக விளைச்சலை பெற முடியும். இருக்கின்ற வாய்ப்புகளை முழுமையாக பயன்படுத்தும் போது நம்முடைய மாவட்டம் முழுமையான வளர்ச்சி பெற்ற முன்னோடி மாவட்டமாக திகழும்.
மக்களுடன் முதல்வர் மனுக்கள் பெறும் திட்டம் இரண்டு கட்டங்கள் முடிவுபெற்று, மூன்றாம் கட்டமாக மனுக்கள் பெறப்படவுள்ளன. இத்திட்டத்தின்கீழ் வழங்கப்படும் மனுக்களின் மீது உடனடி தீர்வு காணப்பட்டு வருகின்றது. எனவே, அரசின் சார்பில் செயல்படுத்தப்பட்டு வரும் திட்டங்களை முழுமையாக பயன்படுத்தி கொள்ள வேண்டுமென கேட்டுக்கொள்கிறேன். இவ்வாறு அவர் கூறினார்.
The post அரசின் திட்டங்கள் அனைத்து தரப்பு மக்களிடம் சென்றடைகிறது appeared first on Dinakaran.
