மதுரை: அரிட்டாப்பட்டி உள்ளிட்ட 48 கிராமங்களையும் பாதுகாக்கப்பட்ட பல்லுயிர் பெருக்க வேளாண் மண்டலமாக அறிவிக்க கொள்கை முடிவெடுத்து தமிழக அரசு அரசிதழில் வெளியிட வேண்டும் என தமிழ்நாடு அனைத்து விவசாயிகள் சங்கங்களின் ஒருங்கிணைப்பு குழு தலைவர் பி.ஆர்.பாண்டியன் தெரிவித்தார்.
மதுரை மாவட்டம் மேலூர் அருகே அரிட்டாபட்டியில் இன்று மத்திய அரசு டங்ஸ்டன் கனிம சுரங்கம் அமைக்க ஏலம் விட்டுள்ள பகுதியில் பி.ஆர்.பாண்டியன் தலைமையிலான குழுவினர் ஆய்வு செய்தனர். அவருடன் முல்லை பெரியாறு பாசன விவசாயிகள் சங்கச் செயலாளர் எல்.ஆதிமூலம், மாநில இளைஞரணித் தலைவர் அருண், தமிழக காவிரி விவசாயிகள் சங்க துணை செயலாளர் எம்.செந்தில்குமார், மாநில இளைஞரணி செயலாளர் மகேஸ்வரன், மதுரை மாவட்டச் செயலாளர் துரைசாமி ஆகியோர் அப்பகுதி மக்களை சந்தித்து பேசினர்.
