சென்னை: சென்னையில் புதிதாக நிர்ணயிக்கப்பட்டுள்ள கட்டண விகிதப்படி பிப்.1-ம் தேதி முதல் ஆட்டோக்களை இயக்க முடிவு செய்துள்ளதாக ஓட்டுநர் சங்கங்களின் கூட்டமைப்பு தெரிவித்துள்ளது. அதேநேரம் செல்போன் செயலி வழியாக சேவை வழங்கும் முன்னணி தனியார் நிறுவனங்களின் கீழ் இனி ஆட்டோ, கால் டாக்ஸிகளை இயக்கமாட்டோம் எனவும் தெரிவிக்கப்பட்டுள்ளது.
இதுதொடர்பாக சென்னையில் செய்தியாளர்களிடம் கூட்டமைப்பின் ஒருங்கிணைப்பாளர் அ.ஜாஹிர் ஹூசைன் கூறியதாவது: சென்னை உயர் நீதிமன்றம் கடந்த 2013-ம் ஆண்டு 1.8 கி.மீ.க்கு ரூ.25-ம், கூடுதல் கி.மீ.க்கு ரூ.12-ம் ஆட்டோ மீட்டர் கட்டணம் நிர்ணயித்தது. இந்நிலையில் இந்த கட்டணத்தை மாற்றி அமைக்க நீதிமன்றம் உத்தரவிட்டது. நாங்களும் மீட்டர் போட்டு ஆட்டோ ஓட்ட தயாராக இருக்கிறோம். ஆனால் இதுவரை தமிழக அரசு ஆட்டோ மீட்டர் கட்டணத்தை மாற்றி அமைக்கவில்லை.
