ராமேசுவரம்: தமிழக கடற்கரை பகுதிகளில் கடல் ஆமைகளை பாதுகாக்க ‘ஆமை நடை’ திட்டத்தை விரைவில் அறிமுகப்படுத்த மன்னார் வளைகுடா உயிர்க் கோள காப்பகம் நடவடிக்கை எடுத்து வருகிறது. சென்னை, திருவள்ளூர், செங்கல்பட்டு ஆகிய மாவட்டங்களில் கடந்த ஒரு வாரத்தில் 500-க்கும் மேற்பட்ட ஆமைகள் இறந்து கரை ஒதுங்கின. இவற்றின் திடீர் இறப்பு சுற்றுச்சூழல் ஆர்வலர்களிடையே அதிர்ச்சியை ஏற்படுத்தியுள்ளது.
ஆமைகள் அழிவின் விளிம்பில் உள்ள உயிரினங்கள் பட்டியலில் உள்ளன. அவற்றை பிடிப்பதற்கு தடை விதிக்கப்பட்டுள்ளது. இந்நிலையில், ஆமைகள் இறந்து கரை ஒதுங்கியது குறித்து தேசிய பசுமை தீர்ப்பாயம் தாமாக முன்வந்து வழக்காக எடுத்து, அதற்கான காரணங்கள் மற்றும் தடுப்பதற்கு எடுத்துவரும் நடவடிக்கைகள் குறித்து தமிழக அரசு பதிலளிக்க உத்தரவிட்டுள்ளது.
