புதுச்சேரி: இடையார்பாளையம் பகுதியில் உள்ள பாலத்தின் இணைப்பு சாலை திடீரென உள்வாங்கி சேதமடைந்தது. இதனால் கடலூர்-புதுச்சேரி சாலையில் மீண்டும் போக்குவரத்து நிறுத்தப்பட்டுள்ளது. பாலத்தை சீரமைக்கும் பணியில் பொதுப்பணித்துறை, நெடுஞ்சாலை பிரிவு அதிகாரிகள் தீவிரமாக ஈடுபட்டு வருகின்றனர்.
ஃபெஞ்சல் புயல் காரணமாக புதுச்சேரியில் கடந்த 30-ம் தேதி முதல் அதி கனமழை பெய்தது. இடைவிடாது கனமழையால் புதுச்சேரி முழுவதும் வெள்ளக்காடானது. மேலும் சங்கராபரணியாறு, தெண்பெண்ணை ஆறுகளில் வெள்ளப்பெருக்கு ஏற்பட்டது. குறிப்பாக தென்பெண்ணையாற்றில் ஏற்பட்ட வெள்ளப்பெருக்கால் 20-க்கும் மேற்பட்ட கிராமங்களுக்கும் தண்ணீர் புகுந்தது. சாலைகளிலும் தண்ணீர் பெருக்கெடுத்து ஓடியது. இதனால் பொதுமக்கள் மிகுந்த சிரமத்தை சந்தித்தனர்.
