சத்தீஸ்கரில் நக்சல் தீவிரவாதத்தை அழிக்க மாநில காவல் துறை சார்பில் கடந்த 2008-ம் ஆண்டில் மாவட்ட ரிசர்வ் கார்டு (டிஆர்ஜி) என்ற சிறப்பு படைப்பிரிவு உருவாக்கப்பட்டது. இந்த படையில் 3,500-க்கும் மேற்பட்ட வீரர்கள் உள்ளனர். சத்தீஸ்கர் காவல் துறையின் டிஆர்ஜி படை மற்றும் மத்திய அரசின் சிஆர்பிஎப் படையை சேர்ந்த 1,000 வீரர்கள் கடந்த சில மாதங்களாக சத்தீஸ்கர் வனப்பகுதிகளில் தீவிரவாதிகளை தேடும் பணியில் ஈடுபட்டு வருகின்றனர்.
வனப்பகுதிகளில் தீவிரவாதிகளின் நடமாட்டத்தை அறிய அண்மைக்காலமாக ட்ரோன்கள் மூலமும் கண்காணிப்பு பணி மேற்கொள்ளப்படுகிறது. ட்ரோன் கண்காணிப்பின்போது சத்தீஸ்கரின் கரியாபந்து மாவட்ட வனப்பகுதியில் சுமார் 80-க்கும் மேற்பட்ட நக்சல் தீவிரவாதிகள் பதுங்கியிருப்பது தெரியவந்தது. இந்த வனப்பகுதி ஒடிசா எல்லைக்கு அருகே அமைந்திருக்கிறது.
