புதுடெல்லி: உத்தரப் பிரதேசம் சம்பல் மசூதி வழக்கு விவகாரத்தில் இந்து தரப்பினரின் வழக்கறிஞர் விஷ்ணு சங்கர் ஜெயினுக்கு கொலை மிரட்டல் விடுக்கப்பட்டுள்ளது. இவரது புகைப்படமும் சமூக வலைதளங்களில் பகிரப்படுவது தொடர்பாக அளிக்கப்பட்ட புகாரின் பேரில் காவல் துறை எஃப்.ஐ.ஆர் பதிவு செய்துள்ளது.
உத்தரப் பிரதேசத்தின் சம்பலிலுள்ள ஜாமா மசூதி, அங்கிருந்த ஹரிஹரன் கோயிலை இடித்துக் கட்டப்பட்டதாக புகார் உள்ளது. இதன் மீது சம்பலின் செஷன்ஸ் சிவில் நீதிமன்றத்தில் வழக்குப் பதிவானது. இதன் நீதிபதி, மசூதியினுள் நவம்பர் 19-இல் கள ஆய்வுக்கு அனுமதி அளித்து, அதே நாளில் அப்பணியும் துவங்கியது. அதன்பின், மீண்டும் நவம்பர் 24-இல் ஆய்வு நடத்த முற்பட்டபோது, வெடித்த கலவரத்தால் 4 பேர் பலியாகினர்; 34 பேர் கைதாகினர்.
