சென்னை: சிதம்பரம் நடராஜர் கோயிலில் ஆறு கால பூஜை நேரங்கள் தவிர்த்து மற்ற நேரங்களில் கனகசபையில் நின்று தரிசனம் செய்ய பக்தர்களுக்கு அனுமதிக்கப்படும் என பொது தீட்சிதர்கள் தரப்பில் தெரிவிக்கப்பட்டுள்ளது.
சிதம்பரம் நடராஜர் கோயில் கனகசபை மீது நின்று பக்தர்கள் தரிசனம் செய்ய அனுமதியளித்து பிறப்பிக்கப்பட்ட அரசாணையை எதிர்த்து பொது தீட்சிதர்கள் உள்ளிட்ட பலர் சென்னை உயர் நீதிமன்றத்தில் வழக்குகள் தொடர்ந்துள்ளனர். இந்த வழக்கு கடந்த முறை விசாரணைக்கு வந்தபோது, நடராஜர் கோயில் கனகசபையில் நின்று பக்தர்கள் தரிசனம் செய்ய எந்தெந்த நேரங்களில் அனுமதிக்கப்படுவர், என்ன நடைமுறை பின்பற்றப்படும் என்பது குறித்த திட்டம் வகுத்து தாக்கல் செய்யப்படும் என பொது தீட்சிதர்கள் தரப்பில் உறுதியளிக்கப்பட்டு இருந்தது.
