ஸ்ரீநகர்: ஜம்மு காஷ்மீரின் கத்ராவில் நடந்த ஒரு மதநிகழ்ச்சியில் பங்கேற்ற தேசிய மாநாட்டு கட்சியின் தலைவர் பரூக் அப்துல்லா பக்தர்களுடன் சேர்ந்து காவித் துண்டு அணிந்து இந்தி பஜனைப் பாடலைப் பாடினார்.
அன்னை வைஷ்ணோ தேவி கோயில் யாத்திரைக்கான அடிப்படை முகாமில் வியாழக்கிழமை நடந்த நிகழ்வின் போது பரூக் அப்துல்லா,இந்தி பஜனைப் பாடலை பாடினார். 87 வயதான தேசிய மாநாட்டு கட்சித் தலைவர் ஆஸ்ரமத்தின் உள்ளே அமர்ந்திருந்த போது, பஜனைப் பாடல் பாடிக் கொண்டிருந்த நபர் ஒருவர் பரூக்கிடம் மைக்கைக் கொடுத்தார். மைக்கைக் கொடுத்த நபர், குறிப்பிட்ட ஒரு பஜனைப் பாடலின் முதல் வரியைப் பாட, பரூக் அப்துல்லா, மீதி வரிகளைப் பாடினார். அப்போது அன்னை வைஷ்ணோ தேவி பக்தர்கள் அணிவதுபோல் காவித் துண்டு ஒன்றையும் அவர் அணிந்திருந்தார்.
