திருப்பதி மலைப்பாதையில் தொடரும் விபத்துகளால் பக்தர்கள் அச்சமடைந்து வருகின்றனர்.
திருப்பதி ஏழுமலையான் கோயிலுக்கு செல்ல அலிபிரியில் இருந்து ஒரு பாதையும், அங்கிருந்து திருப்பதிக்கு வர ஒரு பாதையும் அமைக்கப்பட்டுள்ளது. இதில் 1944-ம் ஆண்டு முதல் பாதை அமைக்கப்பட்டது. இது 19 கி.மீ தூரம் கொண்டதாகும். இது திருமலையில் இருந்து திருப்பதிக்கு வர தற்போது பயன்படுத்தப்பட்டு வருகிறது. இரண்டாவது மலைப்பாதை கடந்த 1974-ல் அலிபிரி அடிவாரத்தில் இருந்து திருமலைக்கு அமைக்கப்பட்டது. கடல்மட்டத்தில் இருந்து 3200 அடி உயரத்தில் திருமலை உள்ளது. இந்நிலையில் இந்த மலைப்பாதைகள் அதிக வளைவுகள் கொண்டதாக இருப்பதால் அடிக்கடி வாகன விபத்து ஏற்படுகிறது. திருமலையின் 2-வது மலைப்பாதையில் கடந்த ஞாயிற்றுக்கிழமை 2 விபத்துகள் நடந்தன. இதில் 3 பேர் காயங்களுடன் உயிர் தப்பினர்.
