புதுடெல்லி: டெல்லி முதல்வரும், ஆம் ஆத்மி கட்சியின் கல்காஜி தொகுதி வேட்பாளருமான அதிஷி, தேர்தலில் போட்டியிட பொதுமக்களிடம் நிதி திரட்டும் பிரச்சாரத்தை (crowd funding campaign) ஞாயிற்றுக்கிழமை தொடங்கி வைத்தார். மேலும் கட்சியின் பணிகள் மற்றும் நேர்மையை மக்கள் ஆதரிப்பார்கள் என்று தான் நம்புவதாக அவர் தெரிவித்தார்.
டெல்லியில் செய்தியாளர்கள் சந்திப்பில் பேசிய அதிஷி, மக்கள் பணத்தை நன்கொடையாக செலுத்துவதற்கான ஆன்லைன் லிங்கினை வெளியிட்டார். மேலும், "தேர்தலில் போட்டியிடுவதற்கு தனக்கு 40 லட்சம் தேவை. ஆம் ஆத்மி கட்சி எப்போதும் சாதாரண மக்களின் சிறிய நன்கொடை பணத்தின் மூலமாகவே தேர்தல்களைச் சந்தித்து வருகிறது. இது நேர்மையான அரசியல் பணிக்கு உதவுகிறது" என்று தெரிவித்தார்.
