வாடிகன் சிட்டி: கத்தோலிக்க கிறிஸ்தவ மத தலைவரான போப் பிரான்சிஸ் (88) நிமோனியா பாதிப்பால் கடந்த 14ம் தேதி முதல் ரோமில் உள்ள மருத்துவமனையில் சிகிச்சை பெற்று வருகிறார். அவருக்கு இரு நுரையீரலிலும் தொற்று இருப்பதாக மருத்துவர்கள் தெரிவித்துள்ளனர். ஆரம்ப கட்ட சிறுநீரக செயலிழப்பு பாதிப்பு இருந்தாலும் அது கட்டுக்குள் இருப்பதாக கூறி உள்ளனர்.
இந்நிலையில், 11 நாள் சிகிச்சைக்குப் பிறகு போப் பிரான்சிசின் உடல் நிலையில் லேசான முன்னேற்றம் ஏற்பட்டிருக்கிறது. இது குறித்து வாடிகன் நேற்று வெளியிட்ட அறிக்கையில், ‘‘போப் இரவு முழுவதும் நிம்மதியாக உறங்கினார். நுரையீரல் தொற்றால் அவர் இன்னமும் ஆபத்தான கட்டத்தில் இருப்பதாக டாக்டர்கள் கூறினாலும், உடல் நிலையில் லேசான முன்னேற்றம் ஏற்பட்டுள்ளதாக தெரிவித்துள்ளனர்.
சனிக்கிழமை முதல் அவருக்கு சுவாச பிரச்னைகள் இல்லை. மருத்துவமனை அறையிலிருந்தே தனது பணிகளை தொடங்கி இருக்கிறார்’’ என கூறப்பட்டுள்ளது. இதற்கிடையே, போப் பிரான்சிஸ் குணமடைய வேண்டி, வாடிகன் செயின்ட் பீட்டர்ஸ் சதுக்கத்தில் நேற்று முன்தினம் இரவு சிறப்பு பிரார்த்தனை நடந்தது. கடும் குளிரிலும், மழையிலும் 4,000க்கும் மேற்பட்ட மக்கள் குவிந்து பிரார்த்தனையில் பங்கேற்றனர். மேலும், உலகம் முழுவதும் பல இடங்களில் போப் பிரான்சிசுக்காக தொடர்ந்து சிறப்பு பிரார்த்தனைகள் நடந்து வருகின்றன.
* புனிதர்கள் அறிவிப்பு குறித்து ஆலோசனை
நிமோனியாவால் ஆபத்தான நிலையில் மருத்துவமனையில் அனுமதிக்கப்பட்டுள்ள போப் பிரான்சிஸ் உடல் நிலையில் நேற்று முன்னேற்றம் ஏற்பட்டதால் வாடிகன் வெளியுறவுத்துறை செயலாளரையும், அவரது துணை அதிகாரியையும் சந்தித்து, புனிதர்களுக்கான புதிய ஆணைகளுக்கு ஒப்புதல் அளித்து, அவர்களின் புனிதர் பட்டத்திற்கான தேதிகளை நிர்ணயிப்பதற்கான முறையான கூட்டத்தை நடத்தியதாக வாடிகன் தெரிவித்துள்ளது.
The post நிமோனியாவால் பாதிக்கப்பட்ட போப் உடல்நிலையில் லேசான முன்னேற்றம் : வாடிகனில் ஆயிரக்கணக்கானோர் பிரார்த்தனை appeared first on Dinakaran.
