லண்டன்: ஆஸ்திரேலிய அணி உடனான ஐசிசி உலக டெஸ்ட் சாம்பியன்ஷிப் இறுதிப் போட்டியில் தரமான இன்னிங்ஸ் ஒன்றை அரங்கேற்றம் செய்துள்ளார் தென் ஆப்பிரிக்க அணியின் கேப்டன் தெம்பா பவுமா. இடது காலின் தொடை பகுதியில் உடல் ரீதியான பின்னடைவு இருந்த போதும் அதை தனது தன்னம்பிக்கை மற்றும் விடாமுயற்சியினால் வென்று காட்டி உள்ளார்.
தென் ஆப்பிரிக்க அணிக்காக சதம் பதிவு செய்த முதல் கருப்பின வீரர் என பவுமா அறியப்படுகிறார். 2014-ல் டெஸ்ட் கிரிக்கெட்டில் அறிமுகமானார். அந்த அணிக்காக கருப்பினத்தை சேர்ந்த வீரர்கள் டெஸ்ட் கிரிக்கெட்டில் 5 சதங்களை பதிவு செய்துள்ளனர். அதில் நான்கு சதங்களை பவுமா பதிவு செய்துள்ளார். அந்த அணியில் கருப்பின பவுலர்களின் ஆதிக்கம் இருந்தாலும் பேட்டிங்கில் அது இல்லாமல் போனது. அதை உடைத்தவர் பவுமா.
