சென்னை: பிரபலங்களைப் பற்றிய போலி செய்திகளைப் பயன்படுத்தி மோசடி முதலீட்டு வலைத்தளங்களை ஊக்குவிக்கும் சமூக ஊடகப் பதிவுகள் குறித்த எச்சரிக்கையாக இருக்கும்படி பொதுமக்களுக்கு சைபர் கிரைம் போலீசார் எச்சரிக்கை விடுத்துள்ளனர். மேலும் இதுகுறித்து வெளியான அறிக்கையில்;
“பிரபலங்கள் பற்றிய பரபரப்பான தலைப்புச் செய்திகள் மற்றும் நன்கு அறியப்பட்ட செய்தி நிறுவனங்களின் போலி லோகோக்கள் அடங்கிய சமூக ஊடக பதிவுகள் பரவி வருவதாலும், பங்கு வர்த்தகம், கிரிப்டோகரன்சி மற்றும் பிற நிதி திட்டங்கள் மூலம் போலி முதலீட்டு வாய்ப்புகளை ஊக்குவிப்பதாலும் தமிழ்நாட்டின் சைபர் குற்றப் பிரிவு ஏற்கனவே ஒரு ஆலோசனையை வெளியிட்டுள்ளது.
ஸ்ரேயா கோஷல், டாக்டர் சுதா மூர்த்தி போன்ற பிரபல நபர்கள் சம்பந்தப்பட்ட போலி செய்திகளுடன் இதுபோன்ற சமூக ஊடக பதிவுகள் பெருகுவது. சமூக ஊடக பயனர்களுக்கு குறிப்பிடத்தக்க ஆபத்தை ஏற்படுத்துகிறது.சைபர் குற்றப் பிரிவின் சைபர் ரோந்துக் குழு சமூக ஊடக தளங்களில் தீவிரமாக கண்காணித்துமோசடி இணைப்புகள் மற்றும் வலைத்தளங்களை அகற்றி வருகிறது.
மோசடி நடவடிக்கைகளுக்கு எக்ஸ் தளம் அதிகமாக பயன்படுவதைத் தடுக்க செயலூக்கமான நடவடிக்கைகளை எடுக்க எக்ஸ் தளத்திற்கு ஒரு அறிவிப்பு அனுப்பப்பட்டுள்ளது. ஸ்ரேயா கோஷல் போன்ற பிரபலங்களைப் பற்றிய போலி செய்திகளைப் பயன்படுத்துவது உட்பட முதலீட்டு மோசடிகளின் பெருக்கம் பயனர்களுக்கு குறிப்பிடத்தக்க ஆபத்தை ஏற்படுத்துகிறது. சந்தேகத்திற்கிடமான இவ்வகையான பதிவுகளைக் கண்டறிந்து அகற்ற வலுவான சரிபார்ப்பு செயல்முறைகளைச் செயல்படுத்த எக்ஸ்க்கு தகுந்த வழிகாட்டுதல்களை வழங்குமாறு உள்துறை அமைச்சகத்தின் கீழ் இயங்கும் இந்திய சைபர் ஒருங்கிணைப்பு மையத்திற்கு (i4c) ஒரு கடிதம் அனுப்பப்பட்டுள்ளது.
இதுவரை, ஸ்ரேயா கோஷல் சில வர்த்தக தளங்களை ஊக்குவித்ததாகக் கூறப்படும் தவறான தகவல்களைக் கொண்ட 25 X* பதிவுகளை அடையாளம் கண்டுள்ளது. மேலும் இவை அனைத்தும் சைபர் க்ரைம் போலீசாரால் நீக்கப்பட்டுள்ளன. கூடுதலாக, இந்த தவறான செய்திகளுடன் தொடர்புடைய 38 வலைத்தளங்கள் மற்றும் வர்த்தக தளங்கள் அடையாளம் காணப்பட்டு தடுக்கப்பட்டுள்ளன.
இவ்வாறான போலியான பதிவுகளை எக்ஸ் தளத்தில் வெளியிட்ட சில பெயர்கள் “நியூஸ் பல்ஸ்” “ஹாஃப் பிரைஸ் ஷாப்”, “ஆசம்”, “சினிமாக்குத்தூசி” ஆகியவை ஆகும். இந்த Xபதிவுகளில் மேலும் அறிக என்பதை கிளிக் செய்யும்பொழுது போலி செய்திகளை சித்தரிக்கும் Express247.com news.mirroruserestart today, indiantodaynewsp.com, fxroad.com போன்ற வலைத்தளங்களுக்கு மக்கள் கூட்டிச்செல்லப்படுகின்றனர்.
இதே போன்று புகழ் பெற்ற பொது நபர்களான மாண்புமிகு இந்திய குடியரசுத் தலைவர், மாண்புமிகு இந்தியப் பிரதமர். ஈஷா நிறுவனர் சத்குரு போன்றவர்களின் புகைப்படங்கள் மற்றும் காணொளிகளைப் பயன்படுத்தி மோசடி முதலீட்டு தளங்களை ஊக்குவிக்கும் ஒரு போக்கு ஃபேஸ்புக்கில் உருவாகியுள்ளது என்பது அடையாளம் காணப்பட்டுள்ளது. இதில் தொடர்புடைய 18 பேஸ்புக் பதிவுகள் மற்றும் அதனுடன் தொடர்புடைய 15 வலைத்தளங்களை சைபர் க்ரைம் பிரிவு அடையாளம் கண்டுள்ளது. இந்த பதிவுகள் மற்றும் போலி செய்தி வலைத்தளங்களை அகற்றுவதற்கான முயற்சிகள் நடந்து வருகின்றன.
மோசடி எவ்வாறு செயல்படுகிறது:
1 பிரபலங்கள் தொடர்பான போலி மற்றும் ஆபத்தான செய்திகளை சமூக ஊடக தளங்களில், பெருவாரியாக எக்ஸ். (முன்பு ட்விட்டர்) இல் வெளியிடுவதன் மூலம் மோசடி செய்பவர்கள் செயல்படுகிறார்கள். இந்த பதிவுகள் பெரும்பாலும் சில பின்தொடர்பவர்களைக் கொண்ட சரிபார்க்கப்பட்ட கணக்குகளிலிருந்து வருகின்றன. மேலும் பரபரப்பான தலைப்புச் செய்திகளைப் பயன்படுத்தி பொதுமக்களின் கவனத்தை ஈர்க்கும் வகையில் வடிவமைக்கப்பட்டுள்ளன.
2 பயனர்கள் இந்த இடுகைகளைக் கிளிக் செய்யும் போது, அவை உண்மையானதாகத் தோன்றும் போலி செய்தி வலைத்தளங்களுக்கு திருப்பி விடப்படுகின்றன. இந்த பக்கங்களில் நன்கு அறியப்பட்ட பிரபலங்களைப் பற்றிய இட்டுக்கட்டப்பட்ட கதைகள் உள்ளன. இதில் மார்ஃப் செய்யப்பட்ட படங்கள் மற்றும் குறிப்பிட்ட முதலீடு அல்லது வர்த்தக தளங்கள் மூலம் அவர்கள் பெரும் லாபம் ஈட்டுகிறார்கள் என்ற தவறான கூற்றுக்கள் உள்ளன. அவற்றில் போலி முதலீட்டு வலைத்தளங்களுக்கான இணைப்புகளும் உள்ளன.
3. வருமான வரித் துறையும் நீதித்துறை அமைப்பும் இந்த விஷயத்தை மறுஆய்வு செய்ததாகவும். பிரபலம் நிரபராதி என்று கண்டறிந்ததாகவும், முதலீட்டு தளம் சட்டபூர்வமானது மற்றும் நம்பகமானது என்றும் அந்த கதை பொய்யாகக் கூறுகிறது. இது நம்பகத்தன்மையை உருவாக்குவதற்கும், வர்த்தக தளம் நியாயமானது என்று வாசகர்களை நம்ப வைப்பதற்கும் வேண்டுமென்றே உருவாக்கபட்ட ஒரு சூழ்ச்சியாகும்.
4. அவ்வாறு செய்வதன் மூலம் மோசடி செய்பவர்கள் போலி முதலீட்டு வலைத்தளங்களை ஊக்குவித்து, சந்தேகத்திற்கு இடமில்லாத நபர்களை அந்த வலைத்தளத்தில் தங்கள் பணத்தை முதலீடு செய்ய ஏமாற்றுகிறார்கள். இதன் மூலம் அவர்கள் சைபர் மோசடிகளுக்கு பலியாகிறார்கள்.
ஆன்லைன் சமூக ஊடக தளங்களுக்கான ஆலோசனைகள்.
இந்த குற்றவியல் நெட்வொர்க்குகளின் மோசடி செயல்கள் செய்ய அப்பாவி குடிமக்களை கவர்ந்திழுக்க முயற்சிக்கும் இதுபோன்ற பதிவுகளை அடையாளம் காண செயலூக்கமான நடவடிக்கைகளை எடுக்குமாறு எக்ஸ். மெட்டா போன்ற சமூக ஊடக தளங்கள் அறிவுறுத்தப்படுகின்றன. இந்த தளங்கள் சரிபார்ப்பு கட்டணங்கள் மற்றும் விளம்பரங்கள் மூலம் பெரும் வருவாயை ஈட்டினாலும். மோசடி நடவடிக்கைகளைக் குறைப்பதற்கான முயற்சிகள் கவனிக்கப்படவில்லை என்பது குறிப்பிடத்தக்கது. இது கவலைக்குரிய விஷயமாக உள்ளது.
பொதுமக்களுக்கு அறிவுரை
1 சந்தேகத்திற்கிடமான இணைப்புகள் அல்லது இடுகைகளைக் கிளிக் செய்வதைத் தவிர்க்கவும். குறிப்பாக பிரபல செய்திகள் அல்லது படங்களைப் பயன்படுத்துபவர்கள், பரபரப்பான கூற்றுக்களைச்
2. சரிபார்க்கப்படாத ஆதாரங்கள் மூலம் ஊக்குவிக்கப்படும் முதலீட்டுத் திட்டங்கள் அல்லது வர்த்தக தளங்கள் பொது நபர்களால் அங்கீகரிக்கப்பட்டதாகத் தோன்றினாலும் அவற்றை நம்ப வேண்டாம்.
3. அதிகாரப்பூர்வ வலைத்தளங்கள் அல்லது நம்பகமான ஊடகங்கள் மூலம் செய்திகள் மற்றும் விளம்பரங்களை சரிபார்க்கவும்.
4. அதிகாரப்பூர்வமாக அங்கீகரிக்கப்படாத அல்லது ஒழுங்குபடுத்தப்படாத வலைத்தளங்கள் அல்லது தளங்களில் தனிப்பட்ட அல்லது நிதி விவரங்களைப் பகிர்வதைத் தவிர்க்கவும்.
புகாரளித்தல்;
இதேபோன்ற மோசடி நடவடிக்கைகளில் நீங்கள் பாதிக்கப்பட்டிருந்தால் அல்லது சந்தேகத்திற்கிடமான செயல்பாடுகளைக் கண்டால் உடனடியாக நடவடிக்கை எடுக்கவும். சைபர்கிரைம் கட்டணமில்லா உதவி எண் 1930-யை அழைக்கவும் அல்லது www.cybercrime.gov.in இல் புகார் பதிவு செய்யவும்” என தெரிவிக்கப்பட்டுள்ளது.
The post பிரபலங்களை பற்றிய போலி செய்திகளை பயன்படுத்தி மோசடி: சைபர் கிரைம் போலீசார் எச்சரிக்கை appeared first on Dinakaran.
