சென்னை: “பெரியாரை மரியாதை குறைவாக பேசக்கூடியவர்களுக்கு எல்லாம் நான் மரியாதை கொடுக்க தயாராக இல்லை” என்ற முதல்வர் ஸ்டாலின், “ஆளுநர் ரவி அனைத்து பிரச்சினைகளிலும் அரசுக்கு எதிராகதான் செயல்பட்டுக் கொண்டிருக்கிறார். அது எங்களுக்கு நன்றாகதான் உள்ளது. அவர் தொடர்ந்து அதை செய்ய வேண்டும். அவருடைய போக்கு இந்த ஆட்சிக்கு சிறப்பைதான் சேர்க்கிறது” என்றார்.
வடசென்னை வளர்ச்சி திட்டத்தின் கீழ் நடைபெற்று வரும் திட்டப் பணிகளை முதல்வர் ஸ்டாலின் ஆய்வு செய்தார். பின்னர், செய்தியாளர்களிடம் கூறியது: “நான் சென்னை மாநகராட்சிக்கு மேயராக இருந்தபோதும், தொடர்ந்து துணை முதல்வராக இருந்தபோதும் இதே வடசென்னை பகுதிக்கு குறிப்பாக சென்னைக்கு என்னென்னப் பணிகளையெல்லாம் செய்தேன் என்பது உங்களுக்குத் தெரியும். அதில் குறிப்பிட்டு சொல்லவேண்டும் என்றால், மழைநீர் வடிகால் பணிகளை மேற்கொண்டது, போக்குவரத்து நெரிசல் அதிகமாக இருந்த 10 இடங்களில் மேம்பாலங்கள் கட்டியதை பெரிய சாதனையாக நான் கருதுகிறேன்.
