மதுரை: மதுரை மாவட்டத்தில் ஏழு வகை வண்ணத்துப்பூச்சிகள் முதல்முறையாக கண்டறியப்பட்டுள்ளது. உலகில் ஏறக்குறைய 20,000 வகையான வண்ணத்துப்பூச்சிகள் இதுவரை கண்டறியப்பட்டுள்ளன. இந்தியாவில் 6 குடும்பங்களைச் சேர்ந்த சுமார் 1,800 வண்ணத்துப்பூச்சி இனங்கள் கண்டறிந்துள்ளனர். தமிழகத்தில் 320-க்கும் மேற்பட்ட வண்ணத்துப்பூச்சி இனங்கள் உள்ளதாக தமிழ்நாடு வனத்துறை 2018-ஆம் ஆண்டு வெளியிட்ட தமிழ்நாட்டின் வண்ணத்துப்பூச்சிகள் நூல் குறிப்பிட்டுள்ளது.
மதுரை இயற்கை பண்பாட்டு அறக்கட்டளை குழுவினர் கடந்த 28-ம் தேதி மதுரை மாவட்டம் பேரையூர் வட்டம், து.கிருஷ்ணாபுரம் பகுதியில் இருந்து சதுரகிரி மகாலிங்கம் கோயில் செல்லும் மலைப்பாதையில் வண்ணத்துப்பூச்சிகள் குறித்து ஆய்வு மேற்கொண்டனர். காட்டுயிர் ஆய்வாளர் விஸ்வநாத் ஒருங்கிணைப்பில் இந்த ஆய்வு மேற்கொள்ளப்பட்டது.
