சென்னை: சென்னை காவல் ஆணையர், உயர் கல்வித் துறை அமைச்சர் ஆகியோர் மாறுபட்ட கருத்தை தெரிவித்து வருவது, அண்ணா பல்கலை. மாணவி பாலியல் வன்கொடுமை வழக்கு விசாரணையில் பல்வேறு சந்தேகங்களை ஏற்படுத்துவதாக பாஜக மாநிலத் தலைவர் அண்ணாமலை கூறியுள்ளார்.
அண்ணா பல்கலைக்கழக மாணவி பாலியல் வன்கொடுமை செய்யப்பட்ட வழக்கில் ஞானசேகரன் என்ற நபரை போலீஸார் கைது செய்து விசாரணை நடத்தி வருகின்றனர். இதுதொடர்பாக நேற்று சென்னை காவல் ஆணையர் அருண் செய்தியாளர்களிடம் கூறுகையில், “மாணவி பாதிக்கப்பட்டது தொடர்பாக, பல்கலைக்கழகத்தில் இருந்து காவல் கட்டுப்பாட்டு அறையை தொடர்பு கொண்டு அளித்த புகாரின் பேரில், வழக்குப்பதிவு செய்யப்பட்டது,” என்றார்.
