புதுச்சேரி மேட்டுப்பாளையத்தில் கனரக வாகன முனையம் (டிரக் டெர்மினல்) உள்ளது. இங்கு உழவர்கரை நகராட்சிக்கு சொந்தமான இடத்தில், தொழிற்சாலைகளின் குப்பைக் கழிவுகள் கடந்த 12 ஆண்டுகளுக்கும் மேலாக கொட்டப்பட்டு வந்தது. தொழிற்பேட்டை பகுதியில் இந்த இடம் இருப்பதால், இங்கு குப்பைக் கழிவுகள் சேருவது தவிர்க்க முடியாதது என்று சொல்லப்பட்டு வந்தது.
இதற்கிடையே, உழவர்கரை நகராட்சி நிர்வாகம் ரோட்டரி கிளப் ஆப் பாண்டிச்சேரி பீச் டவுன் அமைப்புடன் இணைந்து, அங்கு சுற்றுச்சூழல் பூங்கா ஒன்றை அமைத்து, நல்ல ஒரு சூழியல் செயல்பாட்டுக்கான முயற்சியை மேற்கொண்டுள்ளது. சுமார் 30 ஆயிரம் சதுரடி கொண்ட இந்த இடத்தில் குவிக்கப்பட்டிருந்த குப்பைகளை அகற்றி, மியாவாக்கி காடு மற்றும் சுற்றுச்சூழல் பூங்காவை அமைத்துள்ளனர். மேலும், இந்த சுற்றுச்சூழல் பூங்கா உள்ளே மழைநீர் சேகரிப்பு நிலையம் ஒன்றையும் அமைத்துள்ளனர்.
