கூடலூர்: பெரியாறு அணை பராமரிப்புப் பணிக்காக கொண்டு செல்லப்பட்ட கட்டுமானப் பொருட்கள் 2-ம் நாளாக கேரள வனத் துறையினரால் நிறுத்தி வைக்கப்பட்டுள்ளன.
முல்லை பெரியாறு அணையில் மராமத்துப் பணிக்காக தமிழக நீர்வளத் துறை அதிகாரிகள் கட்டுமானப் பொருட்களை நேற்று முன்தினம் கொண்டு சென்றனர். வல்லக்கடவு எனும் இடத்தில் சென்றபோது, கேரள வனத் துறை சோதனைச்சாவடியில் கட்டுமானப் பொருட்களைக் கொண்டுசென்ற இரு லாரிகளும் தடுத்து நிறுத்தப்பட்டன. கேரள நீர்வளத் துறையிடம் அனுமதி பெற்ற பின்னரே கட்டுமானப் பொருட்கள் கொண்டு செல்லப்படுவதாக தமிழக அதிகாரிகள் தெரிவித்தனர். ஆனால், தங்களுக்கு இதுகுறித்து எந்த தகவலும் வராததால், அவற்றை அனுமதிக்க மாட்டோம் என்று கேரள வனத் துறை அதிகாரிகள் தெரிவித்துள்ளனர். இந்நிலையில், இரண்டாம் நாளாக கட்டுமானப் பொருட்கள் கொண்டு சென்ற லாரிகள் நேற்றும் முல்லை பெரியாறு பகுதிக்குள் அனுமதிக்கப்படவில்லை.
