கூடலூரில் விளைச்சல் குறைந்திருந்த நிலையில், காபிக்கு கூடுதல் விலை கிடைத்து வருவது விவசாயிகளை மகிழ்ச்சி அடையச் செய்துள்ளது.
நீலகிரி மாவட்டம் கூடலூர், பந்தலூர் பகுதிகளில் தேயிலைக்கு அடுத்தபடியாக விவசாயிகள் காபி செடி சாகுபடியில் ஈடுபட்டு வருகின்றனர். இங்கு 10,700 ஏக்கரில் ரொபஸ்டோ வகை காபி, 5,750 ஏக்கரில் அரபிக்கா வகை காபியைப் பயிரிட்டுள்ளனர். ஆண்டுதோறும் மார்ச், ஏப்ரல் மாதங்களில் காபி செடிகளில் பூ பூக்கும். நவம்பர் முதல் ஜனவரி வரை காபி பழங்கள் பறிக்கும் பணி நடைபெறும். காபி பழங்களைக் காயவைத்து, அதன் உள்ளிருக்கும் பருப்பு காபி பவுடர் தயாரிக்கப் பயன்படுத்தப்படுகிறது.
