கடந்த 2015-ம் ஆண்டு உடைந்த கவுரிவாக்கம் தாங்கல் ஏரியை சீரமைக்க வலியுறுத்தி, அதிகாரிகள் முதல் தமிழக முதல்வர்கள் வரை தொடர்ந்து 7 ஆண்டுகளாக முறையிட்டு வருகிறார் அப்பகுதி விவசாயி. தாம்பரம் மாநகராட்சி செம்பாக்கம் மண்டலத்தில் கவுரிவாக்கம் தாங்கல் ஏரி உள்ளது. மொத்தம், 48 ஏக்கர் பரப்பு கொண்ட இந்த ஏரியின் நான்கு திசைகளிலும் ஆக்கிரமிப்புகளால் சூழப்பட்டுள்ளது.
இதனால், 10 ஏக்கருக்கும் குறைவான பரப்புக்கு இந்த ஏரி சுருங்கிவிட்டது. மழைக்காலங்களில் ஏரியில்தண்ணீரை சேமிக்க முடியாத நிலை ஏற்பட்டுள்ளதோடு, கழிவுநீர் கலந்து ஏரி நீர் துர்நாற்றம் வீசுகிறது. இந்த ஏரியை நம்பி 25 ஏக்கருக்கும் அதிகமான பரப்பளவில் விவசாயம் நடைபெற்று வருகிறது. 2015-ம் ஆண்டு கனமழை நேரத்தில், ஆக்கிரமிப்பு வீடுகள் பாதிப்படைந்ததால் மர்ம நபர்கள் ஏரியின் கரையை உடைத்தனர்.
