சென்னை: “பொள்ளாச்சி சம்பவம் முழுவதுமே அதிமுக பிரமுகர்களால்தான் நடத்தப்பட்டது என்று அந்த வழக்கை விசாரித்த சிபிஐ தெரிவித்துள்ளது. இப்படி, பெண்களுக்கு எதிரான ஆட்சி நடத்திய ‘சார்’ங்க எல்லாம் இப்பொழுது பேட்ஜ் அணிந்துகொண்டு வருகிறார்கள். இதுபோன்று 100 சார் கேள்விகளை அதிமுகவைப் பார்த்து என்னால் கேட்க முடியும்” என்று தமிழக முதல்வர் மு.க.ஸ்டாலின் சட்டப்பேரவையில் கூறியுள்ளார்.
தமிழக சட்டப் பேரவையில், சென்னை அண்ணா. பல்கலைக்கழக மாணவி ஒருவர் மீது நடைபெற்ற பாலியல் வன்கொடுமை தொடர்பாக கொண்டுவரப்பட்ட கவன ஈர்ப்புக்கு, பதிலளித்து முதல்வர் மு.க.ஸ்டாலின் பேசியது: “சென்னை மாணவி விவகாரத்தில் மட்டுமல்ல, எந்தப் பாலியல் வன்கொடுமை புகாரிலும் இந்த அரசு நடவடிக்கை எடுக்காமல் வேடிக்கை பார்ப்பதும் இல்லை. விலகி நிற்பதும் இல்லை. மனசாட்சி இல்லாமல், பெண்களின் பாதுகாவலர்கள் மாதிரி பேசுபவர்கள் கடந்த அதிமுக ஆட்சியில் பொள்ளாச்சியில் என்ன நடந்தது என்று கொஞ்சம் நினைத்துப் பார்க்க வேண்டும்.
