ஹைதராபாத்: புஷ்பா 2 சிறப்பு காட்சியின்போது ஏற்பட்ட கூட்ட நெரிசலில் சிக்கி பெண் ஒருவர் உயிரிழந்த வழக்கில் தெலுங்கு நடிகர் அல்லு அர்ஜுனிடம் ஹைதராபாத் போலீஸார் செவ்வாய்க்கிழமை சுமார் நான்கு மணிநேரம் விசாரணை நடத்தினர். முன்னதாக, இன்று விசாரணைக்கு ஆஜராகும் படி அவருக்கு போலீஸார் திங்கள்கிழமை சம்மன் அனுப்பியிருந்தனர்.
விசாரணைக்கு ஆஜராக நடிகர் அல்லு அர்ஜுன் முற்பகல் 11 மணியளவில் சிக்கடபள்ளி காவல் நிலையத்துக்கு வந்தார். அவருடன், அவரது தந்தையும், தயாரிப்பாளருமான அல்லு அரவிந்த் மற்றும் வழக்கறிஞர்கள் சென்றனர். நடிகர் அல்லு அர்ஜுனிடம், துணை காவல் ஆணையர் (மத்திய மண்டலம்) அக்‌ஷன் யாதவ் தலைமையிலான போலீஸார் மதியம் 2.45 மணி வரை விசாரணை நடத்தினர்.
