தாம்பரம் மாநகராட்சிக்கு உட்பட்ட திருநீர்மலையில் உள்ள நாட்டு கால்வாய் மற்றும் ஏரி ஆகியவற்றை சீரமைக்க வேண்டுமென அப்பகுதி மக்கள் நீண்ட காலமாக கோரி வருகின்றனர். இதனிடையே, இந்த பணிகளுக்காக ரூ.53 கோடி நிதியை ஒதுக்கீடு செய்ய வேண்டும் என்று நீர்வளத்துறையினர் அரசுக்கு கருத்துரு அனுப்பினர். ஆனால் அரசு பட்ஜெட்டில் ரூ.5.15 கோடி மட்டுமே ஒதுக்கீடு செய்துள்ளதால் மக்கள் கடும் அதிருப்தியில் உள்ளனர்.
செங்கல்பட்டு மாவட்டம் தாம்பரம் மாநகராட்சிக்கு உட்பட்ட பகுதியில் திருநீர்மலையில் பெரிய ஏரி உள்ளது. 194.01 ஏக்கர் பரப்பளவு கொண்ட இந்த ஏரி ஆக்கிரமிப்பால், 146.94 ஏக்கராக சுருங்கிவிட்டது. மேலும், தாம்பரம், குரோம்பேட்டை, பல்லாவரம் மற்றும் சுற்றியுள்ள பகுதிகளில் இருந்து வெளியேறும் கழிவு நீர், பல ஆண்டுகளாக இதில் கலக்கிறது.
