சென்னை: அம்பேத்கர் இந்துத்துவா கொள்கைக்கு எதிரி என்று திருமாவளவன் தீவிரமாக பிரச்சாரம் செய்கிறார். இதுதொடர்பாக ஒருநாள் விவாதத்துக்கு வாருங்கள் என்று அவருக்கு நான் சவால் விட இருக்கிறேன் என்று ‘துக்ளக்’ இதழின் ஆசிரியர் குருமூர்த்தி தெரிவித்தார்.
துக்ளக் இதழின் 55-வது ஆண்டு நிறைவு விழா சென்னை ஆழ்வார்பேட்டையில் நேற்று முன்தினம் நடைபெற்றது. இதில் பங்கேற்றவர்கள் பேசியதாவது: ‘துக்ளக்’ ஆசிரியர் குருமூர்த்தி: காங்கிரஸ் இல்லாத பாரதம் என்ற பாஜகவின் கொள்கையை ஏற்கமுடியாது. பாரத ஜனநாயகத்துக்கு எதிர்க்கட்சி என்பது அவசியம். ஆனால், அந்த கட்சியின் எதிர்காலம் ராகுலை சார்ந்துள்ளது. தலைமை பொறுப்புக்கு ராகுல் தகுதியில்லை என்பதை முன்பே கூறிவிட்டோம். தற்போது கூட்டணியில் உள்ள தோழமை கட்சிகளும் அதை உணர்ந்து கூறிவருகின்றனர்.
