முப்படை தளபதி பிபின் ராவத், அவரது மனைவி மதுலிகா ராவத் உள்ளிட்ட 13 பேர் உயிரிழந்த ஹெலிகாப்டர் விபத்துக்கு மனித தவறே காரணம் என நாடாளுமன்ற நிலைக்குழு அறிக்கையில் தெரிவிக்கப்பட்டுள்ளது.
கடந்த 2021-ம் ஆண்டு டிசம்பர் 8-ம் தேதி அப்போதைய முப்படை தளபதி பிபின் ராவத், அவரது மனைவி மதுலிகா ராவத் உள்ளிட்ட 14 பேர் கோவை மாவட்டம் சூலூரில் உள்ள விமானப் படை தளத்தில் இருந்து நீலகிரி மாவட்டத்தில் உள்ள வெலிங்டனுக்கு ஹெலிகாப்டரில் பயணம் செய்தனர். இவர்கள் சென்ற, விமானப் படையின் எம்ஐ-17 வி5 ரக ஹெலிகாப்டர் வெலிங்டனுக்கு 10 கி.மீ. தொலைவுக்கு முன் விபத்துக்குள்ளானது. குன்னூர் அருகே காட்டேரி மலைப்பாதையில் அதிக மேகமூட்டம் இருந்ததால் ஹெலிகாப்டர் மலையில் மோதியது. இதில் ஹெலிகாப்டர் நொறுங்கி விழுந்து தீப்பற்றி எரிந்ததில் பிபின் ராவத், அவரது மனைவி மதுலிகா ராவத் மற்றும் 11 பேர் உயிரிழந்தனர். குரூப் கேப்டன் வருண் சிங் மட்டுமே உயிர் பிழைத்தார்.
