சென்னை: சென்னை நேரு விளையாட்டு அரங்கத்தில் உள்ள ஒலிம்பிக் அகடமியில் புதிதாக ‘தமிழ்நாடு விளையாட்டு அறிவியல் மையம்’ அமைக்கப்பட்டுள்ளது. சுமார் ரூ.3 கோடியில் அமைக்கப்பட்டுள்ள இந்த மையத்தை துணை முதலமைச்சர் உதயநிதி ஸ்டாலின் இன்று காலை திறந்து வைத்தார். ஒலிம்பிக் அகடமியின் 3வது தளத்தில் உள்ள இந்த மையத்தில் விளையாட்டு செயல்திறன், உடற்பயிற்சி, உடல் நலன், உடலியல், உளவியல், விளையாட்டு மருத்துவம் ஆகிவற்றுக்கு முக்கியத்துவம் அளித்து, விளையாட்டு வீரர், வீராங்கனைகளுக்கு செயல்திறனை மேம்படுத்துவதையும், கூடவே உடற்பயிற்சி அறிவியலின் மூலம் உடல் நலனை மேம்படுத்துவதையும் இலக்காக கொண்டு இந்த மையம் அமைக்கப்பட்டுள்ளது.
கூடவே தேனி மாவட்டம், பெரியகுளத்தில் உள்ள மாவட்ட விளையாட்டு வளாகத்தில் ரூ.5.95 கோடி மதிப்பில் கட்டபட்டுள்ள பல்நோக்கு உள் விளையாட்டு அரங்கம், ராமநாதபுரம் மாவட்டம் பரமகுடியில் உள்ள மாவட்ட விளையாட்டு வளாகத்தில் ரூ.50லட்சம் மதிப்பில் பளுதூக்குதல் பயிற்சி மையம் ஆகியவற்றையும் காணொளி வாயிலாக தொடங்கி வைத்தார். பெரியகுளம் பல்நோக்கு விளையாட்டு அரங்கம் நிர்வாக கட்டடம், பயிற்சியாளர் அறை, வீரர்கள் தங்கும் அறை, பார்வையாளர்களுக்கான இருக்கைகள், மரத்திலான தரைதளம், கையுந்துபந்து, கூடைப்பந்து, மேசை பந்து, இறகுப்பந்து, உபகரணங்களுக்கான வைப்பு அறை மற்றும் ஒளிரும் மின்விளக்கு வசதிகளுடன் அமைக்கப்பட்டுள்ளது.
இந்த நிகழ்ச்சியில் அமைச்சர்கள் பெரியசாமி, ராஜகண்ணப்பன், சேகர்பாபு, தமிழ்நாடு இளைஞர் நலன் மற்றும் விளையாட்டு மேம்பாட்டுத் துறை செயலாளர் டாக்டர் அதுல்ய மிஸ்ரா, எஸ்டிஏடி உறுப்பினர் செயலர் மேகநாத ரெட்டி ஆகியோர் பங்கேற்றனர்.
The post விளையாட்டு அறிவியல் மையம்: துணை முதல்வர் தொடங்கி வைத்தார் appeared first on Dinakaran.
