திருவனந்தபுரம்: கேரள மாநிலம் மலப்புரம் அருகே போலி இன்ஸ்டா கணக்கு தொடங்கி கல்லூரி மாணவிக்கு மார்பிங் செய்த ஆபாச போட்டோக்களை அனுப்பி ரூ. 5 லட்சம் பணம் கேட்டு மிரட்டிய 3 வாலிபர்களை போலீசார் கைது செய்து சிறையில் அடைத்தனர். கேரள மாநிலம் மலப்புரம் அருகே உள்ள கொண்டோட்டி பகுதியை சேர்ந்த கல்லூரி மாணவி ஒருவருக்கு சில தினங்களுக்கு முன்பு இன்ஸ்டாகிராமில், அவரது ஆபாச போட்டோக்கள் வந்தன. அதை பார்த்து முதலில் அவர் அதிர்ச்சியடைந்தார். தொடர்ந்து போட்டோக்களை பரிசோதித்தபோது அது மார்பிங் செய்து இருந்தது தெரியவந்தது. இதனால் அதை மாணவி கண்டுகொள்ளாமல் இருந்தார். இந்தநிலையில் சில நாள் கழித்து அதே இன்ஸ்டாகிராம் கணக்கில் இருந்து மாணவிக்கு ஒரு மெசேஜ் வந்தது. அதில் உடனே ரூ. 5 லட்சம் அனுப்பி வைக்காவிட்டால் ஆபாச புகைப்படங்களை சமூக வலைதளங்களில் வெளியிடப்படும் என்று குறிப்பிடப்பட்டிருந்தது.
தொடர்ந்து மாணவி கொண்டோட்டி போலீசில் புகார் செய்தார். அதைத்தொடர்ந்து போலீசார் வழக்கு பதிவு செய்து விசாரணை நடத்தி வந்தனர். அதன் பிறகும் மாணவிக்கு தொடர்ந்து பணம் கேட்டு மிரட்டல் வந்தது. இதனால் பயந்த மாணவி மிரட்டல் விடுத்த நபருக்கு 2 பவுன் தங்க செயினை கொடுக்க தீர்மானித்தார். இந்த தகவல் போலீசுக்கு தெரியவந்தது. இதனால் போலீசார் மாணவியை கண்காணித்து வந்தனர். இந்தநிலையில் நேற்று மாணவி மிரட்டல் விடுத்த நபருக்கு தனது செயினை கொடுக்க செல்வது தெரியவந்தது. அப்போது அவரை பின்தொடர்ந்து சென்ற போலீசார் மிரட்டல் விடுத்த நபரை கையும் களவுமாக மடக்கிப் பிடித்தனர். விசாரணையில் அவர் கொண்டோட்டி பகுதியை சேர்ந்த முகம்மது தஷ்ரீப் (21) என்பது தெரியவந்தது.
பின்னர் அவருக்கு உடந்தையாக இருந்த நண்பர்களான முகம்மது நிதாஸ் (21), முகம்மது ஷான் (22) ஆகியோரையும் போலீசார் கைது செய்தனர். தஷ்ரீப் மாணவியுடன் ஒரே பள்ளியில் படித்துள்ளார். அப்போது ஏற்பட்ட பழக்கத்தை பயன்படுத்தி அவரை மிரட்டி பணம் பறிக்க திட்டமிட்டார் என்று போலீசார் தெரிவித்தனர். விசாரணைக்குப் பின் 3 பேரையும் போலீசார் மலப்புரம் நீதிமன்றத்தில் ஆஜர்படுத்தி சிறையில் அடைத்தனர்.
The post கல்லூரி மாணவிக்கு ஆபாச புகைப்படங்களை அனுப்பி ரூ.5 லட்சம் கேட்டு மிரட்டல்: 3 வாலிபர்கள் கைது appeared first on Dinakaran.
