கர்நாடக அரசு அறிவித்த சிறந்த நடிகருக்கான விருதை ஏற்க மறுத்த ‘நான் ஈ’ பட வில்லன் கிச்சா சுதீப்.. காரணம் என்ன?

பெங்களூரு: கர்நாடக மாநில அரசு அறிவித்த சிறந்த நடிகருக்கான விருதை நடிகர் கிச்சா சுதீப் நிராகரித்தார். கன்னட திரையுலகில் முன்னணி நடிகராக இருப்பவர் நடிகர் கிச்சா சுதீப். இவர் தமிழிலும் நான் ஈ, புலி, பாகுபலி, முடிஞ்சா இவன புடி போன்ற திரைப்படங்களில் நடித்துள்ளார். இவருக்கு கர்நாடகாவில் பெரும் ரசிகர் பட்டாளம் உள்ளது. இந்நிலையில் 2019ல் வெளியான ‘பயில்வான்’ படத்திற்காக நடிகர் கிச்சா சுதீப்பிற்கு சிறந்த நடிகருக்கான விருது என்பது அறிவிக்கப்பட்டது.

கொரோனா பரவல் உள்ளிட்ட பல்வேறு காரணங்களால் 5 ஆண்டுகள் தாமதமாக கர்நாடகா அரசு சார்பில் விருது பட்டியல் என்பது வெளியிடப்பட்டுள்ளது. இந்நிலையில் விருதை ஏற்க நடிகர் கிச்சா சுதீப் மறுத்துள்ளார். இது தற்போது கர்நாடக திரையுலகில் பெரும் பேசுபொருள் ஆகியுள்ளது. இதுதொடர்பாக தனது எக்ஸ் தளப்பக்கத்தில் அவர் பதிவிட்டுள்ளதாவது;

மரியாதைக்குரிய கர்நாடக அரசு மற்றும் நடுவர் மன்ற உறுப்பினர்களே,

சிறந்த நடிகர் பிரிவின் கீழ் மாநில விருதைப் பெற்றிருப்பது பாக்கியம். மேலும் இந்த கௌரவத்திற்காக நடுவர் மன்றத்திற்கு எனது மனமார்ந்த நன்றியைத் தெரிவித்துக் கொள்கிறேன். இருப்பினும், பல ஆண்டுகளாக விருதுகளைப் பெறுவதை எனது தனிப்பட்ட காரணங்களுக்காக தவிர்த்து வருகிறேன்.

இந்தக் கலைக்கு உயிர் கொடுத்த பல தகுதியான நடிகர்கள் உள்ளனர். அவர்கள் இந்த விருதுக்கு என்னை விட அதிக தகுதியானவர்களில் ஒருவர் இந்த விருதைப் பெற்றால் நான் மிகவும் மகிழ்ச்சியடைவேன். விருதுகளைப் பொருட்படுத்தாமல், முழு மனதுடன் அனைவரையும் மகிழ்விக்க விரும்புகிறேன். நடுவர் குழுவின் இந்த அங்கீகாரம் எனக்கு ஊக்கமாக அமைந்துள்ளது.

இந்த அங்கீகாரம் எனது வெகுமதி என்பதால், என்னைத் தேர்ந்தெடுத்ததற்காக ஒவ்வொரு நடுவர் மன்ற உறுப்பினருக்கும் நான் நன்றியுள்ளவனாக இருக்கிறேன். எனது முடிவால் ஏற்பட்ட ஏமாற்றத்திற்கு நடுவர் மன்ற உறுப்பினர்களிடமும் மாநில அரசிடமும் நான் மனதார மன்னிப்பு கேட்டுக்கொள்கிறேன். நீங்கள் எனது முடிவை மதித்து, நான் தேர்ந்தெடுத்த பாதையில் என்னை ஆதரிப்பீர்கள் என்று நம்புகிறேன்.

எனது பணியை அங்கீகரித்து இந்த விருதுக்கு என்னைப் பரிசீலித்ததற்காக, கௌரவ நடுவர் மன்ற உறுப்பினர்களுக்கும், மாநில அரசுக்கும் மீண்டும் ஒருமுறை நன்றி கூறுகிறேன் எனக் குறிப்பிட்டுள்ளார்.

The post கர்நாடக அரசு அறிவித்த சிறந்த நடிகருக்கான விருதை ஏற்க மறுத்த ‘நான் ஈ’ பட வில்லன் கிச்சா சுதீப்.. காரணம் என்ன? appeared first on Dinakaran.