பெங்களூரு: முன்னாள் இந்திய கிரிக்கெட் வீரர் ராபின் உத்தப்பா நடத்தும் ஆடை நிறுவனத்தின் ஊழியர்களின் வருங்கால வைப்பு நிதியில் முறைகேடு செய்ததாக, அவருக்கு எதிராக கைது வாரன்ட் பிறப்பிக்கப்பட்டுள்ளது. சுமார் ரூ.24 லட்சம் தொகையை டிச.27-க்குள் அவர் செலுத்த தவறும் பட்சத்தில் அவர் கைது செய்யப்படுவார்.
இந்திய கிரிக்கெட் அணியின் முன்னாள் தொடக்க ஆட்டக்காரரான ராபின் உத்தப்பா, பெங்களூருவில் இயங்கிவரும் சென்டார்ஸ் லைஃப் ஸ்டைல் பிராண்ட் பி.லிமிட் நிறுவனத்தின் இயக்குநராக இருந்து வருகிறார். அவர் தனது நிறுவனத்தில் பணியாற்றும் ஊழியர்களின் ஊதியத்தில் இருந்து வருங்கால வைப்பு நிதிக்கான தொகையைக் கழித்ததாக குற்றஞ்சாட்டப்பட்டார். ஆனால், அதனை ஊழியர்களின் கணக்கில் டெபாசிட் செய்யவில்லை.
