டெல்லி: சிறுபான்மையினருக்கு எதிராகவும் அரசியல் சட்டத்துக்கு எதிராகவும் வக்ஃப் மசோதா தாக்கல் செய்யப்பட்டுள்ளது என திமுக எம்.பி. ஆ.ராசா தெரிவித்துள்ளார். மக்களவையில் வக்ஃப் மசோதா மீதான விவாதத்தில் திமுக எம்.பி. ஆ.ராசா உரையாற்றினார். அப்போது பேசிய அவர்; வக்ஃப் மசோதாவுக்கு எதிராக தமிழ்நாடு சட்டப்பேரவையில் தீர்மானம் நிறைவேற்றப்பட்டுள்ளது. நாடாளுமன்ற கூட்டுக் குழுவில் எதிர்க்கட்சிகள் தெரிவித்த எந்தக் கருத்துகளும் வக்ஃப் மசோதாவில் இடம்பெறவில்லை.
வக்ஃபு மசோதா குறித்து உண்மைகளை கூறவில்லை:
வக்ஃபு மசோதா குறித்து முழுமையான உண்மைகளை ஒன்றிய பாஜக அரசு கூறவில்லை. அரசியல் சட்டத்தின் மீதான அப்பட்டமான தாக்குதல்தான் வக்ஃப் மசோதா. நாடாளுமன்ற குழுவிடம் சமர்ப்பிக்கப்பட்ட ஆவணங்கள் வக்ஃப் மசோதாவில் பிரதிபலிக்கவில்லை. அரசியலமைப்புச் சட்டம் உருவாக்கத்தின் போது சிறுபான்மையினர் நலன் குறித்த ஆலோசனைக் குழுவின் தலைவராக வல்லபாய் பட்டேல் இருந்தார்.
அரசியல் சட்டத்தின் மீதான அப்பட்டமான தாக்குதல்:
அரசியல்நிர்ணய சபைக்கு வல்லபாய் பட்டேல் அளித்த அறிக்கையை மேற்கோள்காட்டி ஆ.ராசா பேசினார். எந்த அடிப்படையில் வக்ஃப் திருத்த மசோதா கொண்டு வரப்பட்டுள்ளது? என அவர் கேள்வி எழுப்பியுள்ளார்.
மதத்தைப் பற்றி மட்டுமே பாஜக அரசுக்கு கவலை
நேர்மையை பற்றி ஒருகாலத்திலும் பாஜக அரசு கவலைப்பட்டது இல்லை; மதத்தைப் பற்றி மட்டுமே கவலைப்படுகிறது. உண்மையிலேயே நேர்மையாக இருந்தால், 2013ல் உள்ள நடைமுறைகளை மசோதாவில் சேர்ப்பீர்களா? என ஆ.ராசா கேள்வி எழுப்பியுள்ளார்.
வக்ஃப் சொத்துகளை அபகரிக்க முயற்சி:
ஒட்டுமொத்த வக்ஃப் சொத்துகளை அபகரிக்க ஒன்றிய பாஜக அரசு முயற்சிக்கிறது. வக்ஃப் சொத்து என அறிவிக்கப்பட்டதை அரசு சொத்து என அடையாளம் காண்பது தொடர்பான சட்டப்பிரிவே அபத்தமானது. வக்ஃப் வாரியத்துக்கும் அரசுக்கும் இடையிலான பிரச்சனையை தீர்க்க ஆட்சியருக்கு எப்படி அதிகாரம் கொடுக்கலாம்?. வக்ஃபு சொத்துகளை அபகரித்தால் கடுங்காவல் தண்டனை என்று இருந்ததை சாதாரண தண்டனை என மாற்றியுள்ளது புதிய சட்டப்பிரிவு. அரசியல் வேறு, மதம் வேறு; அரசியலில் இருந்து மதத்தைப் பிரித்துப் பாருங்கள்.
ஆர்.எஸ்.எஸ். பின்னால் செல்லாதீர்கள்: ஆ.ராசா
ஆர்.எஸ்.எஸ். கொள்கைக்குப் பின்னால் செல்லாதீர்கள் என்று ஒன்றிய பாஜக ஆட்சிக்கு திமுக எச்சரிக்கை விடுத்துள்ளது. நாடு சுதந்திரம் பெற்றபோது அப்போதைய பிரதமர் நேரு, மாநில முதலமைச்சர்களுக்கு கடிதம் எழுதினார். தனியார் ராணுவம் போன்றதொரு அமைப்பு, நாஜி கொள்கைகளை பின்பற்றக் கூடியதாக இருந்தால் அது அழிவைத்தான் கொண்டு வரும். ஜெர்மனியை பேரழிவுக்கு கொண்டு சென்றது நாஜி கட்சி என்று கடிதத்தில் குறிப்பிட்டிருந்தார் ஜவஹர்லால் நேரு. அதே நாஜி கொள்கைகளை இந்தியாவில் பரவ அனுமதித்தால் அது பெரும் சேதத்தை ஏற்படுத்திவிடும் என்று நேரு எச்சரித்தார். நாஜி கொள்கைகள் பரவ அனுமதித்தால் இந்தியா என்ற நாடு இருக்கும், ஆனால் பெரும் சேதாரத்துக்கு நாடு ஆளாகிவிடும். நாஜி கொள்கைகளால் ஏற்பட்ட பெரும் சேதத்தில் இருந்து நம் நாடு மீள நெடுங்காலம் ஆகிவிடும் என்று நேரு எச்சரித்தார். ஆர்.எஸ்.எஸ். அமைப்பு குறித்தே அன்றைய பிரதமர் ஜவஹர்லால் நேரு எச்சரித்தார். எனவே ஆர்.எஸ்.எஸ்.சின் பின்னால் ஒன்றிய அரசு செல்ல வேண்டாம் என்று திமுக எம்.பி. ஆ.ராசா எச்சரித்தார்.
கிரண் ரிஜிஜூவின் கட்டுக்கதையை அம்பலப்படுத்திய ஆ.ராசா
நாடாளுமன்றத்தில் வக்ஃப் மசோதாவை ஏற்கனவே அறிமுகப்படுத்தியபோது பல கட்டுக்கதைகளை ரிஜிஜூ கூறியுள்ளார். திருச்சி மாவட்டத்தில் பல ஆயிரம் ஏக்கர் நிலத்தை வக்ஃப் சொத்தாக அறிவித்துவிட்டதாக அமைச்சர் ரிஜிஜூ பேசினார். திருச்சி ஆட்சியர் உள்ளிட்ட அதிகாரிகள் நாடாளுமன்றக் கூட்டுக் குழு முன் ஆஜராக வேண்டும் என ரிஜிஜு பேசியது தவறு. அமைச்சர் கிரண் ரிஜிஜூ கூறிய கட்டுக்கதையை கூட்டுக் குழு முன் அரசு அதிகாரிகள் அம்பலப்படுத்தி விட்டனர். இப்போது மீண்டும் வக்ஃப் மசோதா மீதான விவாதத்தை தொடங்கி வைத்து பல கட்டுக்கதைகளை ரிஜிஜூ அவிழ்த்துவிட்டுள்ளார். நாடாளுமன்றக் கட்டடம் வக்ஃப் வாரியத்திடம் அளிக்கப்பட்டு விடும் என்று புதிய கட்டுக்கதையை ரிஜிஜூ கூறியுள்ளார்.
முஸ்லிம் எம்.பி.யே இல்லாத பாஜக பாதுகாக்கப்போகிறதா?
ஒரு முஸ்லிமை கூட எம்.பி.யாக்க முடியாத பாஜக வக்ஃப் சொத்துகளை பாதுகாக்க சட்டம் கொண்டு வருவதாக கூறுகிறது. முஸ்லிம் எம்.பி.யே இல்லாத கட்சி அவர்களை காப்பாற்ற போவதாக கூறுவது எவ்வளவு முரணானது?. வக்ஃப் மசோதாவை நாடாளுமன்றத்தில் தாக்கல் செய்து பேசுவதற்குக் கூட ஒரு முஸ்லிம் எம்.பி. இல்லாத கட்சி பாஜக. அந்த பாஜகதான் மதச்சார்பின்மையை எப்படி பாதுகாப்பது என்று பற்றி எங்களுக்கு போதிக்கின்றது. இவ்வாறு தெரிவித்துள்ளார்.
The post வக்ஃப் மசோதா தாக்கல்.. சிறுபான்மையினருக்கு எதிராக வக்ஃப் மசோதா உள்ளது; அரசியல் சட்டத்தின் மீதான அப்பட்டமான தாக்குதல்: திமுக எம்.பி. ஆ.ராசா காட்டம்!! appeared first on Dinakaran.
