டெல்லி: நெல் ஈரப்பதம் குறித்து ஆய்வுசெய்ய ஒன்றிய அரசு அதிகாரிகள் குழு தமிழ்நாடு வருகிறது. டெல்டா மாவட்டங்களில் 22% ஈரப்பதத்துடன் நெல்லை கொள்முதல் செய்திட வேண்டும் என ஒன்றிய அரசுக்கு தமிழ்நாடு அரசு நேற்று கடிதம் எழுதியிருந்தது. அந்த கடிதத்தில், வடகிழக்குப் பருவமழை இந்த ஆண்டு காலதாமதமாக தொடங்கியதாலும் தொடர்ச்சியாக வடகிழக்குப் பருவமழை பெய்து வருவதாலும் குறிப்பாக டெல்டா மாவட்டங்களில் கடந்த ஒருவார காலமாக விட்டு விட்டு கனமழை பெய்துள்ளதாலும் அறுவடை செய்யும் நெல் மணிகள் அதிக ஈரப்பதத்தில் உள்ளது.
மேலும், வானம் மேகமூட்டத்துடனும், தொடர்ந்து பனிப்பொழிவுடனும் உள்ளதால் விவசாயிகள் நெல்லினை உலரவைக்கச் சிரமப்படுவதால் அதிக ஈரப்பதத்தில் உள்ள நெல் மணிகளைக் கொள்முதல் செய்ய விவசாயிகள், விவசாய சங்கத் தலைவர்கள் மற்றும் மக்கள் பிரதிநிதிகள் கோரிக்கை வைத்துள்ளனர். இதனைத் தொடர்ந்து, விவசாயிகளின் நலனைப் பாதுகாக்கும் வகையில் தற்போது 17% ஈரப்பதத்தில் நெல் கொள்முதல் செய்ய வேண்டும் என்பதைத் தளர்வு செய்து 22% ஈரப்பதம் வரை நெல் கொள்முதல் செய்ய அனுமதி வழங்க தமிழ்நாடு அரசு கோரிக்கை வைத்திருந்தது.
இந்நிலையில், நெல் ஈரப்பதம் குறித்து ஆய்வுசெய்ய ஒன்றிய அரசு அதிகாரிகள் குழு தமிழ்நாடு வருகிறது. ஒன்றிய உணவுத்துறை கீழுள்ள சேமிப்பு மற்றும் ஆராய்ச்சி பிரிவின் 2 உதவி இயக்குநர்கள், 2 அலுவலர்கள் தமிழகம் வருகின்றனர். நெற்பயிர்களை ஆய்வு செய்து ஒன்றிய அரசின் உணவு அமைச்சகத்திற்கு அறிக்கை அளிக்க குழுவுக்கு உத்தரவு பிறப்பிக்கப்பட்டுள்ளது.
The post 22% ஈரப்பத நெல்லுக்கு அனுமதி கிடைக்குமா?: ஆய்வுசெய்ய ஒன்றிய அரசு அதிகாரிகள் குழு தமிழ்நாடு வருகை! appeared first on Dinakaran.
