பெங்களூரு: பெங்களூருவில் ரவுடி கொடூர கொலை செய்யப்பட்ட விவகாரத்தில் பாஜக எம்எல்ஏ மீது கொலை வழக்குப்பதிவு செய்யப்பட்டுள்ளது. கர்நாடக மாநிலம் பெங்களூரு அடுத்த கித்தகனூர் பகுதியை சேர்ந்த சிங்கரெட்டி என்பவருக்குச் சொந்தமான நிலத்தை, அதே பகுதியை சேர்ந்த ரவுடி சிவபிரகாஷ் (40) என்பவர் பொது அதிகார பத்திரம் மூலம் மிரட்டி வாங்கியுள்ளார். இந்த நிலத்தின் பத்திரத்தை ரத்து செய்துவிட்டு, அந்த நிலத்தை காலி செய்யுமாறு சிவபிரகாசுக்கு தொடர்ச்சியாக மிரட்டல்கள் வந்துள்ளன. இவ்விவகாரம் தொடர்பாக கடந்த மூன்று மாதங்களுக்கு முன்பு பெங்களூரு காவல் ஆணையரிடம் சிவபிரகாஷ் எழுத்துப்பூர்வமாக ஒரு புகார் அளித்திருந்தார்.
அதில், கிருஷ்ணராஜபுரம் தொகுதி பாஜக எம்.எல்.ஏவும், முன்னாள் அமைச்சருமான பைரதி பசவராஜ், அவரது உதவியாளர் மற்றும் உறவினர் ஆகியோர் தனது சொத்துக்களை அபகரிக்க முயற்சிப்பதாகவும், சந்தை மதிப்பை விட மிகக் குறைந்த விலைக்கு சொத்தை விற்குமாறு அழுத்தம் கொடுப்பதாகவும் குறிப்பிட்டிருந்தார். மேலும், தனது நிலத்தை பயன்படுத்த முடியாதபடி தன் மீது பொய் வழக்குகள் போட்டு சட்டரீதியான சிக்கல்களை உருவாக்க முயற்சிப்பதாகவும், சொத்துக்களை ஒப்படைக்கவில்லை என்றால் கொலை செய்துவிடுவதாகவும் அவர்கள் மிரட்டல் விடுத்ததாக சிவபிரகாஷ் தனது புகாரில் தெரிவித்திருந்தார்.
இந்த நிலையில், நேற்று தனது வீட்டின் அருகே உள்ள ஹலசூரு ஏரிப் பகுதியில் சிவபிரகாஷ் நின்று கொண்டிருந்தபோது, காரில் வந்த மர்மக் கும்பல் ஒன்று, அவரை கூர்மையான ஆயுதங்களால் சரமாரியாகத் தாக்கியது. சம்பவ இடத்திலேயே ரத்த வெள்ளத்தில் சிவபிரகாஷ் உயிரிழந்தார். இந்த கொலைச் சம்பவம் குறித்து சிவபிரகாஷின் தாயார் விஜயலட்சுமி காவல் நிலையத்தில் புகார் அளித்துள்ளார். அவரது புகாரின் பேரில், முன்னாள் அமைச்சர் பைரதி பசவராஜ் இந்த கொலையைத் தூண்டியதாக முதல் தகவல் அறிக்கை பதிவு செய்யப்பட்டுள்ளது.
சிவபிரகாஷ் மீது ஏற்கனவே பல குற்ற வழக்குகள் நிலுவையில் உள்ளதாக பெங்களூரு கிழக்கு சரக இணை காவல் ஆணையர் ரமேஷ் பனோத் உறுதிப்படுத்தியுள்ளார். இந்த கொலை சம்பவம் தொடர்பாக விமல் உட்பட ஐந்து பேரை பாரதிநகர் போலீசார் கைது செய்து, புலிகேசிநகர் துணைப் பிரிவு காவல்துறையினருடன் இணைந்து தீவிர விசாரணை நடத்தி வருகின்றனர்.
The post பெங்களூருவில் ரவுடி கொடூர கொலை: பாஜக எம்எல்ஏ மீது கொலை வழக்கு appeared first on Dinakaran.
